Lubhalwe nguLungani Zungu
Amaqembu amabili ezepolitiki i-IFP ne-DA akhe umbimbi ukuzama ukuketula i-ANC KwaZulu-Natal nakwezinye izifundazwe okuhlanganisa ne-Gauteng.
La maqembu womabili kulindeleke ukuthi amemezele ngokusemthethweni umbimbi lwawo esithangamini nabezindseThekwini seThekwini namhlanje.
Lesi sithangami sabezindaba silandela umhlangano obe impumelelo wakamuva phakathi komholi we-IFP uVelenkosini Hlabisa nomholi we-DA uJohn Steenhuisen.
“Womabili amaqembu asazoqinisa ukubambisana kwawo ngaphambi kokhetho lukazwelonke nolwezifundazwe oluzokwenzeka ngonyaka ka-2024,” kusho isitatimende se-IFP ngoMsombuluko.
Aseqalile ukusebenza koMasipala baseGoli, ozishaya isifuba ngesabelomali esikhulu ezingu-R77 billion.
Abahlaziyi abaningi babikezela ukuthi i-ANC izokwehla ngo-50% okhethweni oluzayo lwango-2024 okuzovula ithuba lokuthi umfelandawonye uthathe izintambo.
I-IFP yenze ngendlela egculisayo okhethweni lokuchibiyela eKZN muva nje ibuyisela indawo yayo elahlekile ezindaweni zasemakhaya.
I-IFP ikhule isuka ku-2.4% yafinyelela ku-3.3% okuguqule kwaba ngamavoti angu-588,839 okhethweni lukazwelonke luka-2019.
Ngakolunye uhlangothi i-DA ithole amavoti angu-3.6 million okubabeka njengamaqembu aphikisayo asemthethweni kuzwelonke.
I-ANC ewine ukhetho lukazwelonke, yehla ngo-57% isuka ku-62% ngo-2014, ngemuva kokuthi abantu bakuleli abangaphezudlwana kuka-10 million bevotele leli qembu.
E-KZN, i-ANC ithole u-54% ngo-2019 okuwukwehla isuka ku-64% eyawuthola ngo-2014.
Ngokubona ukwehla kwayo okhethweni i-ANC isayine isivumelwano ne-Economic Freedom Fighters (EFF) kaJulius Malema e-Gauteng naseKZN.
Kodwa lolu hlelo lubhuntshile ngaphambi kokuthi luqale ngemuva kokuthi i-EFF isole i-ANC ngokukhaphela amabharethi abomvu okhethweni lwakamuva lweMeya yase-Ekurhuleni nalapho okuqokwe khona uTania Campbell we-DA njengeMeya kaMasipala.
Isithombe esingenhla esomholi we-IFP uVelenkosini Hlabisa nomholi we-DA uJohn Steenhuisen
Umthombo wesithombe: @ Facebook