Lubhalwe nguCelani Sikhakhane
UNgqongqoshe we-IFP nongumakadebona kwezombusazwe uMfundisi Musa Zondi ugixabeze uNdunankulu wokuqala we-ANC eKZN umsebenzi webhodi lezokuVakasha elingaphansi koMnyango wezokuThuthukiswa koMnotho, ezokuVakasha nokoNgiwa kweMvelo.
UDkt Sbu Ndebele uqokwe ekubeni uSihlalo we-Tourism and Filming Authority Board KwaZulu-Natal ngoMfumfu.
UNdebele waziwa ngamagalelo akhe okudlala indima enkulu ekuqedeni ukuchitheka kwegazi phakathi kwe-IFP noKhongolose KwaZulu-Natal odlameni lwezepolitiki olwaseluqede abantu abangu-20 000.
Ngaphandle kwalokho waba yimbangi enkulu ku-IFP ngesikhathi ehlwitha isifundazwe ngo-2004 kuDkt Lionel Mtshali waqede wasusa iSishayamthetho oNdini wathuthela eMgungundlovu.
Ngesikhathi esenguNdunankulu waKwaZulu-Natal wangena emsindweni ngesipho se-Mercedes Benz S500 ayeyiphiwe inkampani isivananda.
Kwadingeka abuyise leso isipho sonyonyovu lwemoto yohlobo lwe-Mercedes-Benz S500 esasiphuma kosonkontileka abasafufusa abakha imigwaqo ababevame ukuthola imisebenzi kuhulumeni bethi bayambonga ngegalelo lakhe esawuNgqongqoshe wezokuThutha esifundazweni ngemuva kokuqokelwa esobuNgqongqoshe wezokuThutha kuzwelonke ngo-2009 okwathi ngokuhamba kwesikhathi waba wagxekwa ngokuletha ama-etolls ayengathandwa eGoli.
UNdebele uphinde wasebenza njengenxusa lakuleli eNdiya nase-Australia. Manje usengena ebhodini lezokuvakasha nowayeyisikhulu esiphezulu se-Ezemvelo KZN Wildlife uDkt Bandile Mkhize nabanye.
Esithombeni esingenhla: OwayenguNgqongqoshe wezokuthutha kanye noNdunankulu wokuqala we-ANC KwaZulu-Natal uDkt Sbu Ndebele uqokwe ebhodini leKZN Tourism and Filming Authority