Lubhalwe nguRorisang Modiba
Izibikezelo zokuqala zeqhwa e-Gauteng nase-North West zihoxisiwe, njengoba kulindeleke iqhwa ezingxenyeni ezithile zase-Eastern Cape naseLesotho.
IKwaZulu-Natal ibheke imvula enamandla nezikhukhula ezingase zibe khona, njengoba kukhishwe isexwayiso ngesimo sezulu sika-level 2 ngempelasonto.
Izakhamizi zase-Gauteng ezinethemba lokuwa kweqhwa ebusika okungajwayelekile kuzofanele ziqhubeke nokulinda. Imibiko yakamuva yesimo sezulu ithi alikho iqhwa elilindelekile kulesi sifundazwe kuleli sonto.
Isasasa likhule ezinkundleni zokuxhumana ngemuva kokuthi izibikezelo zokuqala zikhombise ukuthi kuzoba neqhwa e-Gauteng, i-North West nase-Highveld. Kodwa ongoti besimo sezulu bathi isimo sesishintshile.
I-Vox Weather ithi iqhwa lenzeka kuphela lapho yonke into ihamba kahle: imvula, umoya obandayo kanye nesistimu yesimo sezulu efanele. Uma into eyodwa ishintsha, iqhwa liyanyamalala.
Yilokho kanye okwenzeka kuleli sonto. Iqhwa elabikezelwa okokuqala ezindaweni ezimaphakathi nezwe manje kulindeleke ukuthi liwele ezingxenyeni zase-Eastern Cape, eLesotho, eningizimu ye-Free State nakwezinye izintaba eziphakeme.
Indawo yaseGoli yagcina ukubona iqhwa ngomhlaka-10 kuNtulikazi ka-2023. Kusukela lapho, ezinye izibikezelo ezimbili zaphakamisa amathemba, kodwa akwenzekanga lutho. Abaningi bebenethemba kodwa selishabalele.
Kulindeleke ukuthi kube nomoya obandayo ngoLwesihlanu, okuzoletha amakhaza ezindaweni eziseningizimu yezwe ngempelasonto.
IKwaZulu-Natal nayo izobhekana namakhaza ezinsukwini ezimbalwa. ISouth African Weather Service isikhiphe isexwayiso sika-level 2 (yellow) ngemvula ephazamisayo esifundazweni. Imvula enamandla ingadala izikhukhula, imigwaqo eshibilikayo nezingozi zezimoto, ikakhulukazi emijondolo nasezindaweni eziphansi.
Ngakho-ke ngenkathi i-Gauteng ibhekane nokubanda futhi yomile, ezinye izingxenye zaseNingizimu Afrika zilungiselela iqhwa, imvula kanye nesimo sezulu esibi kulobu busika.
Esithombeni esingenhla: Indawo ebandayo.
Umthombo wesithombe: Ifayela