Menzi Magubane
Inhlangano eyengamele ibhola emhlabeni wonke i-FIFA, iphoxe uPitso Mosimane kanye ne-Al Ahly njengoba izovumela ukuthi leli qembu lidlulele kwi-Club World Cup ngaphandle kwabadlali balo abathile abahamba phambili.
Ompetha base-Afrika bazoya kulo mqhudelwano ose-United Arab Emirates kuleli sonto ngaphandle kwabadlali abamqoka abayisikhombisa, ngenxa yemidlalo yamazwe nokulimala.
Njengoba i-Egypt idlulela kowandulela owamanqamu kweye-Africa Cup of Nations, uMosimane kuzomele adlale ngaphandle kwabadlali abayisithupha abadlalela iqembu.
UMohamed El-Shenawy, u-Ayman Ashraf, u-Akram Tawfik, uHamdi Fathi, u-Amr El-Sulaya kanye noMohamed Sherif bazophuthelwa iNdebe Yomhlaba Yekilabhu yalo nyaka.
Umgadli weBafana Bafana uPercy Tau naye ngeke abe khona kulo mqhudelwano ngemuva kokulimala umsipha ngoMgqibelo.
Uma sikhuluma iqiniso, i-FIFA iqinisa isandla kwi-Red Devils. Bebengalinda baqale umqhudelwano ngemuva komdlalo wamanqamu we-Afcon ngeSonto. UMosimane sekuzomele adlale neqembu lakhe elibuthaka.
Khonamanjalo, ompetha base-Europe, i-Chelsea banikezwe ikhefu nje ukuze bakwazi ukubamba iqhaza kulo mqhudelwano. Njengoba i-English Premier League izothatha ikhefu elincane, ompetha base-Europe bazoba nesikhathi esiningi sokuphumula kahle ngaphambi kwalo mqhudelwano.
Iqembu likaMosimane lizobhekana neqembu lase-Mexico, i-Monterrey emdlalweni wokuqala ngoMgqibelo ebusuku enkundleni yezemidlalo i-Al Nahyan, e-Abu Dhabi. Lo mdlalo uzodlalwa ngosuku olwandulela owamanqamu we-Afcon.
Iqembu elizowina kulowo mdlalo lizobhekana ne-Palmeiras yase-Brazil kowandulela owamanqamu, kanti i-Chelsea izobhekane neqembu eliwine kowandulela owamanqamu wesibili.
Kuzobe kungokwesithathu uMosimane egila izimanga kulo mqhudelwano. Ngo-2016, wabamba iqhaza njengomqeqeshi weMamelodi Sundowns ngemuva kokuwina i-CAF Champions League. Kulo nyaka kuzobe kungokwesibili edlala neqembu lase-Egypt.
Nyakanye waphuma endaweni yesithathu ngemuva kokuhlula i-Palmeiras.
UMosimane uzobe enethemba lokwenza kangcono kunangonyaka odlule kodwa ngaphandle kwabadlali bakhe abaqinile nabazimiselayo eskwatini, kuzoba umsebenzi onzima kakhulu lowo.
Umthombo wesithombe: @therealpitso
.
