Dylan Bettencourt
I-Fifa isungule iwindi elikhethekile lokushintshana ngabadlali ukuze kuvunyelwe abadlali nabaqeqeshi ukuthi bashiye i-Ukraine ne-Russia okwesikhashana njengoba impi phakathi kwalamazwe amabili iqhubeka.
Izicelo zokuthi inhlangano eyengamele ibhola emhlabeni ivumele abadlali abaphuma emazweni angaphandle ukuthi bahambe kulesi sifunda, ivele ngesonto eledlule njengoba kubikwa ukuthi abadlali abaningi bebekhungathekile njengoba kuhlasela i-Russia.
I-FIFPro, inyunyana enkulu yabadlali ebholeni, icele i-Fifa ukuthi ivumele abadlali abase-Russia abaphuma emazweni angaphandle ukuthi bashiye izwe unomphela.
NgoLwesihlanu, i-Fifa ibe nomhlangano ne-European Club Association ukudingida isisombululo esibhekene nabadlali abaphuma emazweni angaphandle abavaleleke kulesi sifunda. ngoMsombuluko bathathe isinqumo ne-Uefa sokumisa zonke izinkontileka zabadlali nabaqeqeshi abaphuma emazweni angaphandle abasemaqenjini ase-Ukraine kuze kuphele uNhlangulana.
E-Russia abadlali nabaqeqeshi bazozikhethela ukuthi bayazimisa yini izinkontileka zabo kuze kuphele uNhlangulana uma behluleka ukufinyelela esivumelwaneni namaqembu abo.
“Abadlali nabaqeqeshi bazobhekwa njengabaphelelwe yizinkontileka kuze kube umhlaka-30 kuNhlangulaba ngo-2022 futhi bazobe sebekhululekile ukusayina inkontileka nanoma yiliphi iqembu ngaphandle kokubhekana nemiphumela yanoma yiluphi uhlobo,” kusho isitatimende se-Fifa.
Bangeze ngokuthi noma yimuphi umdlali wakulesi sifunda ofisa ukuhamba kumele abe esesayine inkontileka entsha ngomhlaka-7 kuMbasa. Amakilabhu avunyelwe ukusayinisa abadlali ababili abasha ngaphansi kwesinqumo esisanda kwenziwa.
Njengamanje i-Russian Premier League inabadlali abangu-120 abaphuma emazweni angaphandle asebewashiyile amaqembu abo kulandela ukuqubuka kwempi.
UYaroslav Rakitskyi wase-Ukraine ushiye iqembu lase-Russia i-Zenit St Petersburg ngoLwesithathu.
Kodwa-ke i-FIFPro ayizange ijabule ngezinyathelo ezibekwe yi-Fifa.
“Yize ezinye izindlela ezithathwe namuhla ziyizichibiyelo eziwusizo, isinqumo sokuvumela abadlali abaphuma emazweni angaphandle ukuthi bamise izinkontileka zabo bashiye amakilabhu ase-Russia okwesikhashana sidumaza kakhulu. La badlali kufanele bavunyelwe ukunqamula izinkontileka zabo,” kusho inyunyana.
Umthombo wesithombe: @Reuters