Lubhalwe nguDoreen Mokgolo
Amaqembu amabili aphikisayo eGauteng athe iKhabhinethi yesifundazwe esanda kuqokwa iqukethe ikakhulukazi abaholi abadala abafanayo abahlulekile ukwenza umsebenzi phambilini.
UNdunankulu waseGauteng uPanyaza Lesufi umemezele iKhabhinethi yakhe yoNgqongqoshe abayishumi ngoLwesithathu ebusuku, bayisikhombisa abe-ANC, i-Rise Mzansi uyedwa , i-IFP uyedwa kanye ne-PA uyedwa.
Wonke amalungu e-ANC ayisikhombisa abuyela kwikhabhinethi kanti kwenziwe ushintsho oluncane.
Iqembu lihlulekile ukuzuza iningi okhethweni lwangomhlaka-29 kuNhlaba, lathola u-34% kuphela, nokuliphoqe ukuthi limeme amaqembu aphikisayo ukuthi alisize ekwakheni uhulumeni wobumbano lwezifundazwe.
Yize bekunesivumelwano ne-DA, iqembu elikhulu eliphikisayo elino-26.78%, namanye amaqembu amancane ukuthi babumbe uhulumeni, i-DA ihoxile ezingxoxweni ngoba ibingeneme ngezikhundla ezintathu zeKhabhinethi ebizinikeziwe.
NgoLwesine, umholi we-DA eGauteng, uMnuz Solly Msimanga umemezele ukuthi uMnuz Refiloe Ntsekhe, oyiPhini likaSomlomo esiShayamthetho saseGauteng, uzosula esikhundleni.
UNkululeko Dunga, uSihlalo we-EFF eGauteng uthe i-ANC yenze into enhle ngokungavumeli ukulawulwa yi-DA, kodwa iqembu eligqoka ezibomvu liyaphikisana nokuqokwa kabusha kwalaba baholi abadala be-ANC.
“Akusiphathanga kahle ukuqokwa kabusha kobuholi be-ANC kuhulumeni ukuze bulawule ukusekela izinhlaka zangaphakathi esikhundleni sokuqoka abantu abathembekile nabazinikele,” usho kanje.
“Laba oNgqongqoshe behlulekile ukwenza umsebenzi wabo kuhulumeni odlule, futhi ukuklonyeliswa kwabo ngezikhundla kukhombisa ngokusobala ukuthi i-ANC ayizimisele ngokushintsha isimo sabantu.”
USihlalo we-ActionSA eGauteng, uFunzi Ngobeni uthe lesi sigungu esiphezulu sesifundazwe esisanda kuqokwa sisaqhubeka nepolitiki yakudala eguqise isizinda sezomnotho eNingizimu Afrika.
“Izakhamuzi zaseGauteng akufanele zilindele noma yiluphi ushintsho lwangempela kuhulumeni wesifundazwe, obeka phambili ukugxambukela kwe-PR ngaphezu kwezixazululo zangempela kanye nokutshalwa kochwepheshe abanamakhono ukuletha izidingo kubahlali,” kusho uNgobeni.
“Sikhathazekile ngesinqumo sikaNdunankulu sokuhlanganisa imisebenzi yezokuphepha ehhovisi lakhe ngoba uma uhlelo lwakhe lweCrime Wardens luhlulekile, ukuphepha kwezakhamuzi kusengcupheni.”
Isithombe esingenhla: UPanyaza Lesufi.
Umthombo: Sithunyelwe