Celani Sikhakhane
Kubonakala sengathi ngeke kube lula ukwehlisa iMeya yase-Zululand esikhundleni.
Umholi we-Economic Freedom Fighters uJulius Malema noSihlalo weqembu KwaZulu-Natali bangenelele ukuhlenga umsebenzi weMeya yase-Zululand, uMfundisi uThulasizwe Buthelezi.
IMeya ye-Nkatha Freedom Party ibhekane nevoti lokungathenjwa ngemuva kokusolwa ngesonto eledlule ukuthi isebenzise izigidi zamarandi zokulethwa kwezinsiza ukuqasha onogada abazovikela yena nomkakhe.
Nokho ivoti lihoxisiwe ngoLwesibili ngemuva kokuthi uMalema noSihlalo uMnu Vusi Khoza besabise amakhansela ngokuthi angase aphelelwe imisebenzi uma evotela ukususa iMeya.
I-IFP ibambisene ne-EFF e-Zululand nabanye oMasipala baseKZN kanti i-ANC ne-NFP nabo babambisene njengamaqembu aphikisayo.
I-Scrolla.africa ithole ukuthi ikhansela le-EFF, uThulani Ndlovu, ophinde abe iphini leMeya uButhelezi, uthole incwadi evela kuKhoza ngaphambi kokuthi kuvotwe.
Incwadi ebiyalela amakhansela ukuthi angakuvoteli ukususa iMeya, ilandelwe umyalezo othunyelwe ngomqhafazo obuvela kuMalema.
Le ncwadi, ebonwe ngabakwa-Scrolla.Africa, ikhumbuze uNdlovu ukuthi ubuholi be-EFF buyazi ukuthi usebenzisana namaqembu aphikisayo ukukhipha uButhelezi futhi kumele akhumbule ukuthi i-EFF ivota ne-IFP eKZN.
UNdlovu utshele i-Scrolla.Africa ukuthi angeke akwazi ukuphawula ngalolu daba ngoba usamatasa emhlanganweni.
USihlalo wekhokhasi ye-ANC uMnu Khaya Khumalo uthe banqume ukusihoxisa lesi siphakamiso sokuphikisa iMeya ngoba bekukhona nekhansela le-National Freedom Party elivele kuwo womabili amagazethi kaMasipala wakwaNongoma kanye noMasipala wase-Zululand.
“Kuphinde kwaba nodaba lwekhansela le-EFF oluholele ekutheni sihoxise isiphakamiso esiphikisana neMeya uButhelezi. Sisazohlola isimo bese silandela konke okumele kwenziwe,” kusho uKhumalo.
NgoMsombuluko, amalungu omphakathi abeholwa uphiko lwentsha ye-ANC kanye ne-Sanco amashele e-Zululand oLundi efuna ukuthi uButhelezi ehle esikhundleni.
UButhelezi utshele i-Scrolla.Africa ukuthi ngeke akwazi ukuphawula, kanti ubuholi be-EFF abutholakalanga ukuba buphawule njengoba ucingo lukaKhoza belukhala lungabanjwa.