Lubhalwe nguSbongile Nonyana
I-South African Students Congress (Sasco) ehambisana ne-ANC ithole izihlalo eziningi okhethweni lwe-SRC eTshwane University of Technology.
I-EFF Student Command, eyadla umhlanganiso okhethweni lwangonyaka odlule, ibhekane nengwadla ngesikhathi kufika uphiko lwentsha loMkhonto weSizwe (MK) olusanda kusungulwa.
Bobabili bawine izihlalo ezingu-10 iqembu ngalinye.
ISasco enezihlalo ezingu-12 kulindeleke ukuthi ihlangane neqembu elilodwa noma namanye amaqembu amancane ukuze iphathe i-SRC ngempumelelo.
Ukuvota kuzo zonke izikhungo ezinhlanu e-TUT kuqhubeke ngokuthula, kodwa kuqubuke impi phakathi kwe-Sasco kanye ne-EFF Student Command esikhungweni sasePitoli ngo-4 ntambama ngemuva kokuphela kokuvota.
Amalungu e-MK Youth League ajoyine i-Sasco kafushane, ajikijela ngamatshe amalungu e-EFF Student Command ngaphambi kokuhlehla. Impi imile ngesikhathi kufika onogada besikhungo.
Imiphumela yamavoti okugcina imi kanje: i-Sasco (12), I-EFF Student Command kanye ne-MK Youth League bathole izihlalo eziyishumi iqembu ngalinye; iSouth African Democratic Students Movement, ehambisana ne-IFP (4), i-Cristian Organisation (4), i-ActionSA (2) i-TUT Students’ Association ithole isihlalo esisodwa.
Esithombeni esingenhla: Abafundi be-MK bekhankasa eTUT.
Umthombo: Sithunyelwe