Zukile Majova
I-Economic Freedom Fighters (EFF) ijabule kakhulu ngemuva kokusebenza ngokuzikhandla yaqumba phansi i-ANC eMpumalanga okhethweni lokuchibuyela.
I-EFF iwine ukhetho lokuchibiyela ku-ward-11 eNkomazi ngasemngceleni wase-Swatini nase-Mozambique kwaba isigceme sayo sokuqala yakhipha i-ANC emandleni.
Oqokiwe we-EFF nguSurprise Mafia Fane uyisishoshovu esaziwayo somphakathi.
Ukhetho lokuchibiyela lwangoLwesithathu luza ngemuva kokunqanyulwa kobulungu bekhansela le-ANC lalesi sigceme.
Phambilini i-ANC yawina lesi sigceme ngamavoti angaphezu kuka-53%.
Kulokhu iqembu elibusayo lithole amavoti angu-993 kuphela uma kuqhathaniswa namavoti e-EFF angu-1,662. Umuntu ongenele ukhetho ozimele uzuze amavoti angu-223.
Ukuhlulwa eMpumalanga kufinqe isonto elibi kwi-ANC ehluleke ukulawula umasipala wase-Limpopo yize lo mkhandlu ubuphethwe amakhansela e-ANC.
Ezimweni ezixakile kuMasipala wase-Lephalale, uNico Pienaar we-DA uqokwe njengemeya ngemuva kwezingxabano zezombusazwe eziphoqe amalungu amathathu e-ANC ukuthi avotele i-DA.
Lesi sikhundla sivuleke ngesikhathi i-ANC ithatha isinqumo sokususa iMeya ekhohlakele u-Alpheus Thulare.
Lesi sinqumo sihlukanise i-ANC phakathi esifundeni njengoba amanye amakhansela eseka iMeya exoshiwe.
Amakhansela abengagculisekile azamile ukuphazamisa ivoti lomkhandlu lokuvotela ozongena isikhundla sokuba iMeya ye-ANC kodwa akhishwa uSomlomo.
Esikhundleni samakhansela amathathu e-ANC akhishiwe abavotile bavotele i-DA, okunikeze uPienaar amandla okuba imeya.
Sekuzobonakala ukuthi i-ANC izowachitha yini amakhansela angamaqili nokuthi izibeke engcupheni yokulwa nokhetho lokuchibiyela oluzoba nemihuzuko ngenxa yokwehlulwa okhethweni lokuchibiyela ngisho nasezindaweni zayo.
Isithombe esingenhla: Isishoshovu se-EFF eNkomazi
Credit: Lungani Zungu