Lubhalwe ngu-Anita Dangazele
Babalelwa ku-10 000 abantu abangenamakhaya nabalele emahholo omphakathi ngemuva kwezikhukhula ezibulale abantu abangu-57 e-Eastern Cape.
Imiphakathi, amaciko kanye namaqembu asiza abantu bayasebenzisana ukuletha ukudla, amanzi nezingubo zokulala emindenini ethintekile.
Babalelwa ku-10 000 abantu abangenamakhaya kanti abangu-57 bashonile njengoba izikhukhula zihlasele e-Eastern Cape, kodwa imiphakathi esifundazweni sonke ivula izinhliziyo zayo ukusiza labo abalahlekelwe yikho konke.
I-Gift of the Givers ithumele amathangi amanzi, ithimba labatakuli, kanye nosizo oluphuthumayo ezindaweni lapho izikhukhula zicekele phansi khona izinhlelo zamanzi futhi zashiya izinkulungwane zemindeni ingenawo amanzi ahlanzekile.
Amaciko endawo ahlanganise izandla ne-Al-Imdaad Foundation kanye neFashion World ukuletha izingubo, izingubo zokulala, nokudla kubantu abalala emahholo omphakathi.
Izindawo ezikhahlamezeke kakhulu kubalwa e-Butterworth naseMthatha lapho kucekeleke phansi imizi, imigwaqo namanzi, okushiye imindeni ingenalutho.
Amaqembu asiza abantu, amabhizinisi, abaculi baye baphuthuma ukusiza labo abathintekile. I-Gift of the Givers iqinise isandla kuso sonke isifundazwe, ikakhulukazi esifundeni sase-Amathole ne-OR Tambo.
U-Ali Sablay, oyi-project manager kule nhlangano, uthe amathimba abo asebenza ngokungaphezi ukuletha ithemba kwabangenathemba.
Sesitshale amaloli amabili athwala amanzi e-Butterworth izinsuku eziyisikhombisa kulandela njengoba kulimale esihlanza amanzi edolobheni,” usho kanje.
Leli qembu lisiza nabantu abathuthelwe emahholo omphakathi e-Butterworth, eNelson Mandela Bay, naseMthatha. Kulethwe izimpahla namaqembu avela kwezinye izifundazwe. Ukusetshenzwa okuphelele kuzoqalwa maduze nje eMthatha.
IGift of the Givers iphinde yathumela amathimba ayo okuthungatha nokuhlenga ukusiza amaphoyisa abheke abantu abadukile.
Labo abafuna ukusiza bangashiya ukudla okufudumele, izingubo zokugqoka, amathawula ahlanzekile, nezinye izinto ezibalulekile kulezi zikhungo: Isikole Samabanga Aphakeme eSinolwazi e-Decolin, ihholo lomphakathi laseSlovo, Ihholo lomphakathi lase-Northcrest kanye nehholo lesikhungo somphakathi.
Esithombeni esingenhla: Amaciko ase-Eastern Cape uBetusile Mcinga kanye neMist SA belethe izinsiza kwizisulu zezikhukhula esikhungweni somphakathi eMthatha.
Umthombo wesithombe: Facebook