I-Democratic Alliance itshele i-ANC ukuthi isivumelwano sabo siphelile uma ingazitholi izikhundla ezifunayo.
Isiphakamiso se-DA seKhabhinethi sibandakanya uMnyango wezoHwebo, Izimboni nokuNcintisana (DTIC).
I-DA manje icasukile ngesinqumo sikaRamaphosa sokushintsha i-DTIC ngoMnyango wezokuVakasha kanye nokunciphisa isibalo samaphini oNgqongqoshe anikezwayo sisuka kwabayisikhombisa siya kwabayisithupha, kubika i-News24.
UMnuz John Steenhuisen, ongumholi we-DA ubevumile ukuthi uRamaphosa anikeze izihlalo eziyisithupha zoNgqongqoshe okubalwa kuzo ne-DTIC kodwa lolu shintsho selucasule ubuholi be-DA.
Bavumelana ngokuthi isicelo esisha sikaRamaphosa asamukelekile.
URamaphosa uqokwe njengoMengameli emasontweni amabili edlule ngokwesekwa amalungu e-DA ePhalamende.
I-DA iphinde yeseka abagaqele isikhundla sikaSomlomo we-ANC ePhalamende kanye noSihlalo woMkhandlu kaZwelonke weziFundazwe futhi yeseka i-ANC KwaZulu-Natal ngesikhathi i-IFP iphakamisa ukuthi i-ANC ithole izihlalo ezimbalwa esigungwini esiphezulu sesifundazwe.
I-ANC ibheke izinhlelo zokufaka i-IFP, i-PA, i-PAC ne-Good kuphela ngaphandle kwe-DA kwiKhabhinethi.
Nokho lokhu ngeke kunikeze i-ANC izihlalo eziningi ePhalamende likazwelonke. I-ANC izodinga ukwesekwa ngamanye amaqembu ukuze ishaye umthetho okuhlanganisa nesabelomali.
URamaphosa uzophinde abe sengozini yokuthola iziphakamiso zokungabethembi ubuholi bakhe.
NgoLwesithathu, i-ANC ithe isiphakamiso sayo ku-DA siwujuqu, kanti uRamaphosa ne-ANC bamagange ukumemezela iKhabhinethi yokugcina maduze.
Luhlanganiswe ngumbhali we-Staff
Abasesithombeni esingenhla: uCyril Ramaphosa noJohn Steenhuisen.
Umthombo: Ifayela