Njengoba iqembu le-ANC lingaqinisekile ngamavoti ango-2024 selithembele ezitheni zayo ezindala i-EFF, kubhala uZukile Majova.
I-ANC kanye ne-Economic Freedom Fighters basaqhubeka nemihlangano yomfelandawonye, kanti iGoli ilona elisanda kuhlaselwa yilezi zimbangi ezimbili zezombusazwe.
I-EFF yehlulekile ukuwina kunoma yibaphi omasipala bezwe abangaphezu kuka-250 ngemuva kokhetho lohulumeni basekhaya lwangoLwezi nyakenye.
Ngakolunye uhlangothi i-ANC ilahlekelwe imikhandlu emikhulu yomasipala okubalwa uMasipala waseGoli, uMasipala wase-Tshwane, uMasipala wase-Ekurhuleni kanye neNelson Mandela Bay Metro muva nje.
Ukhetho lokugcina lohulumeni basekhaya luphele ngokuthi i-ANC ithole u-46% wamavoti ukwandisa iqiniso elisatshwayo lokuthi leli qembu lingase lehluleke ukuwina okhethweni lukazwelonke oluzoba ngo-2024.
NgoLwesine ubuholi be-EFF obuholwa iPhini likaMengameli uFloyd Shivambu buhlangane nobuholi obuphezulu be-ANC eGoli, obuholwa uSihlalo wesifundazwe ophinde abe ibamba likaNdunankulu uPanyaza Lesufi.
Ekhasini lakhe laku-Twitter uShivambu uthe: “Namuhla sibe nomunye umhlangano owusizo nodingekayo nobuholi be-ANC besiFundazwe saseGoli, lo mhlangano ubudingida izinhlelo zezombusazwe kanye nokubusa. Sizokhuluma esidlangalaleni ngemiphumela uma isihlanganisiwe.”
Ekuqaleni kwesonto i-EFF ihlangane nobuholi be-ANC KwaZulu-Natal lapho i-ANC elandela khona i-IFP eholwa umsunguli wayo uMntwana uMangosuthu Buthelezi ogulayo.
NgoLwesithathu i-IFP ihlenge uhulumeni wayo wobumbano eMhlathuze (e-Richards Bay/Empangeni) KwaZulu-Natal ngokuwina ukhetho lokuchibiyela obelushube esigcemeni se-12.
Lo masipala obalulekile osoGwini oluseNyakatho neKwaZulu-Natal, ungowesithathu ngobukhulu esifundazweni nawo uyindawo enenzuzo enkulu yezokuvakasha futhi uhlanganisa ne-Richards Bay Industrial Development Zone.
Ngaphambi kwalolu khetho lo mkhandlu ubuhlezi usengcupheni yokuthi uthathwe umfelandawonye we-ANC kanye ne-EFF.
Umfelandawonye omusha usebenzela ukuqumba phansi iMeya yaseGoli uMpho Phalatse.
Ukwakha umfelandawonye phakathi kweqembu elibusayo kanye neqembu elihlukene phakathi kunethuba lokudicilela phansi intando yabavoti ngokunika abanye omasipala ukuthi balawulwe i-ANC.
Phambilini umsunguli we-EFF uJulius Malema uthe ufuna ukusebenzisana ne-ANC ekulweni neqembu eliphikisayo i-DA kanye namaqembu amancane.
Kodwa-ke, “singasebenzisana ne-ANC kuphela uma samukela uhlelo oluqinile ne-ANC, futhi uma leso simo singamukelwa sizobe siphikisana njengoba sikhona komasipala abaningi ngoba imibandela yethu ingazange ifezeke.”