Lubhalwe nguDoreen Mokgolo
Ezinhlelweni ezishintshe ngomzuzu wokugcina, i-ANC e-Tshwane, ilandela imiyalelo yabaholi bayo besifundazwe, isisihoxisile isiphakamiso esiphuthumayo sokungabethembi ubuholi bemeya uCilliers Brink.
Lesi siphakamiso besisohlelweni lomhlangano womkhandlu ngoLwesine, kodwa ngemuva kokudonsisana phakathi kwamaqembu mayelana nobekushiwo ngabezindaba ezinsukwini ezimbalwa ezedlule, i-ANC imemezele ukuthi iyasihoxisa lesi siphakamiso.
Lesi siphakamiso besingesinye semizamo ye-ANC yokubuyisela ubuholi bukamasipala onesabelomali ka-R50 billion owathathwa umfelandawonye owawuholwa yi-DA ngo-2016.
NgoLwesine, leli qembu limemezele ukuthi lethule lesi siphakamiso sokukhishwa kwemeya ngenxa yezinsolo zokungaziphathi kahle, elikholelwa ukuthi kunomthelela ekulethweni kwezidingongqangi kubantu.
Lesi siphakamiso besiqhutshwa yisinyathelo sakamuva esinempikiswano ngemeya sokwenqaba ukusebenzisa u-60% wamaloli kadoti abengahambisani nezidingo ezibuyekeziwe zedolobha.
Okhulumela ikhokhasi ye-ANC e-Tshwane, ukhansela Joel Masilela ka Mahlangu, uthe ubuholi besifundazwe bululeke iqembu ukuthi lihoxise isiphakamiso sabo sokungabethembi ubuholi bemeya.
“Kumanje ubuholi bunezingxoxo zokubonisana nezinhlaka zeqembu.
“Ngokuhamba kwesikhathi, sizokwaziswa ngokufanele ukuthi senze kanjani ngesiphakamiso sokungabethembi ubuholi bukamasipala ohlulekile, nongazange uhlinzeke abantu bakithi ngezidingongqangi kule minyaka eyisishiyagalombili edlule.
“Sisamile ekutheni umfelandawonye oholwa yi-DA kumele uphume esikhundleni ngenxa yokungakwazi ukusebenza kwawo,” usho kanje.
USotswebhu we-ANC emkhandlwini wase-Tshwane, u-Aaron Maluleka, usola ukuthi imenenja yedolobha isisungule ibutho lalabo ababesebenza nayo abamele imeya ukuze bakhiphe izimenenja eziphezulu.
UBrink uthe i-ANC ifuna ukwethula isiphakamiso sokungamethembi ngoba idolobha selethule imizamo yokulungisa imiphumela ekuphatheni idolobha.
“Asikwazi ukuba nemithetho ephulwayo ngaphandle kwanoma yimiphi imiphumela,” kusho uBrink. “Bafuna ukusibuyisela ezinsukwini zokuphanga, [kanye] nokuphathwa kabi kwangaphakathi okungenazijeziso.”
Esithombeni ngenhla: Abaholi be-ANC e-Tshwane.
Umthombo: Doreen Mokgolo