Lubhalwe nguCelani Sikhakhane
I-ANC isikhombise ukuzimisela ukuze izuze iSilo samaBandla uMisuzulu kaZwelithini, kanti leli qembu lithenge izipho okubalwa nomhlambi wezinkomo eziyishumi.
Iqembu elibusayo seliphumele obala ngokuthi lihlose ukulungisa ubudlelwano babo neSilo samaBandla uMisuzulu kaZwelithini ukuze sinxenxe abavoti ngaphambi kokhetho lwangonyaka ozayo.
NgeSonto, iqembu lizichithile izinsolo zokuthi izinkomo eziyishumi bezihloselwe ukugwaza kwiSilo.
Lesi senzo sigxekwe kakhulu ezinkundleni zokuxhumana ngoLwesihlanu ngemuva kokuba umholi we-ANC evakashele iSilo samaBandla uMisuzulu kaZwelithini e-Ballito, enyakatho yeTheku.
Ithimba le-ANC eliholwa nguNobhala-Jikelele uFikile Mbalula linikeze iSilo isipho sezinkomo eziyishumi.
UPhilani Mavundla oyingxenye yethimba labeluleki beSilo, uthe kuyichilo futhi kuyindelelo ukusho ukuthi i-ANC ibikhokha imali yokugwaza.
“Isipho sezinkomo kwiSilo samaBandla uMisuzulu kaZwelithini sinjengophawu lokukhothama okuyisiko elijwayelekile uma umuntu noma abantu bezokotha iSilo,” kusho uMavundla.
UMavundla ubeyingxenye yethimba leSilo samaBandla uMisuzulu kaZwelithini ebelihlangene ne-ANC e-Zimbali Lodge e-Ballito ngoLwesihlanu.
Uke waba iPhini lemeya kuMasipala weTheku futhi njengamanje ungumholi we-Abantu Batho Congress oqokwe kanye noSolwazi Jabulani Maphalala.
UMavundla ungusomabhizinisi owaziwayo futhi owachuma ngokwakhiwa kwezinkundla e-Brazil nangesikhathi seNdebe yoMhlaba kuleli ngo-2010.
UMbalula uthe lezi zinkomo eziyishumi beziyingxenye yokukhothamela iSilo samaBandla uMisuzulu kaZwelithini futhi bekuwuphawu lwenhlonipho.
“Umhlangano wethu neSilo bekukhombisa inhlonipho nokumazisa ngokuba khona kwethu esifundazweni.
“Awukwazi ukuvakashela iSilo samaBandla uMisuzulu kaZwelithini ungaphethe lutho. Ngisho nezikhonzi zakhe zingasibulala ngenxa yokungahloniphi. Yingakho simhlonipha ngezinkomo eziyishumi ngesiZulu besizokhuleka kuyengesiXhosa besizokhahlela,” kusho uMbalula.
Isithombe esingenhla: ISilo samaBandla uMisuzulu kaZwelithini noNobhala Jikelele we-ANC uFikile Mbalula e-Ballito ngoLwesihlanu.
Umthombo wesithombe: I-Twitter (Fikile Mbalula)