Lubhalwe nguLungani Zungu
Ngemuva kokungenzi kahle isikhathi eside i-ANC ibe nesonto elihle yazivikela ngempumelelo zonke izigceme zayo ngesikhathi sokhetho lokuchibiyela ngoLwesithathu.
I-ANC igcine izigceme ezimbili eMpumalanga nesisodwa eKapa kodwa yehlile ngamavoti.
USamuel Ngobeni we-ANC uphume njengekhansela lesigceme sesine (Kamaqhekeza Naas) kuMasipala waseNkomazi okuyisizinda se-ANC. Uqoqe amavoti angu-68% ehlula uThando Thulani Sambo weqembu i-Able Leadership (AL) noRaymond Fenkie Mathibe we-EFF.
I-ANC yawina lesi sigceme okhethweni lohulumeni basekhaya lwanyakenye esikhundleni esavuleka ngemuva kokushona kwekhansela.
I-ANC iphinde yathatha isigceme sesi-15 (i-Ntombe Wittenberg) eMkhondo kuMasipala waseGert Sibande ngenani eliphansi kakhulu lamavoti uma kuqhathaniswa nokhetho lwanyakenye.
UMnu Sabelo Shoba we-ANC uqokwe njengekhansela lesigceme ngemuva kokuwina ngo-39%, okuyinani eliphansi uma liqhathaniswa no-48% awuthola nyakenye.
Ukwesekwa kwe-EFF kaJulius Malema kulesi sigceme kwenyuke kusuka ku-9% kwaya ku-22 nokuwuphawu lokukhula kwaleli qembu.
Lesi sigceme sasala singenalo ikhansela ngemuva kokushona kwekhansela.
Izimbangi ezinkulu ze-ANC, i-DA iwine izigceme ezimbili ebiziphethe phambilini eMpumalanga nase-Western Cape.
I-DA ivikele ngempumelelo isigceme sesi-25 (i-Trichardt Secunda) kuMasipala waseGovan Mbeki onesihlalo e-Secunda.
UNicholaas van Huyssteen we-DA ushaye izimbangi zakhe ngokuwina okugculisayo ngo-80% okunyuke kusuka ku-72%.
I-Western Cape iphinde yaba nesigcawu sombango oshubile wamaqembu ezepolitiki ahlukene abebanga isigceme sesi-38 elokishini laseNyanga eKapa kanye nesigceme sesi-17 kuMasipala wase-Drakenstein.
I-ANC igcine iwine lesi sigceme ngo-63%, okuyisibalo esehle sisuka ku-74% iqembu elawuthola nyakenye.
USuzanne Zumana we-ANC uzothatha izintambo njengekhansela kulesi sigceme. Lesi sigceme sivuleke ngemuva kokushona kwekhansela.
I-FF+ inikeze i-DA ivoti layo esigcemeni sesi-17 (Noorder Paarl) e-Cape Winelands phambilini eyayisiphethe njengesihlalo esiphephile se-DA.
I-DA iwine lesi sigceme yize ukwesekwa kwehle kakhulu kusuka ku-80% kwaya ku-49%.
I-FF+ inyuke isuka ku-13% yaya ku-41%.
ULorraine Cyster we-DA useyikhansela elisha lesigceme.
Phambilini lesi sigceme besiphethwe i-DA sase sisala singenakhansela ngenxa yokwesula esikhundleni kwekhansela.
.
