Lubhalwe nguLungani Zungu
Izinombolo aziqambi amanga. Ngemuva kokuhlangana ne-EFF, i-ANC ivele izinto zayihambela kahle enkabeni ye-IFP kwaNongoma e-Zululand.
Lokhu kusho ukuthi umfelandawonye oholwa i-ANC usengakwazi ukuthatha izintambo zokuphatha uMasipala wakwaNongoma okokuqala ngqa emlandweni.
Konke kuqala ngesiphakamiso sokungathenjwa esimelene neMeya ye-IFP u-Albert Mncwango esihlelelwe ukuba kuleli sonto umbimbi we-EFF, i-ANC kanye ne-National Freedom Party (NFP).
Umasipala osenyakatho yeKwaZulu-Natal ubuphethwe umfelandawonye we-IFP ne-EFF ngemuva kokuthi lingabibikho iqembu elithola amavoti amaningi okhethweni lohulumeni basekhaya lwangoLwezi ngo-2021.
Njengamanje lo masipala awuphethwe muntu ngemuva kokuwa komfelandawonye we-IFP ne-EFF.
Lezi zibalo zivuna i-EFF, i-ANC kanye ne-NFP futhi ziphikisana kakhulu ne-IFP.
I-IFP inezihlalo ezingu-20, i-NFP ezingu-14, i-ANC eziyisishiyagalombili, i-EFF ezimbili kanye National People’s Front enesihlalo esisodwa.
Sekuhlangene umfelandawonye we-EFF, i-ANC kanye ne-NFP unezihlalo ezingu-24 uma kuqhathaniswa nezihlalo ezingu-20 ze-IFP mhlawumbe nesihlalo esisodwa se-NPF okungenzeka ithathe uhlangothi lwe-IFP.
Indlela imeya uMncwango angasinda ngayo kuzoba ukuthi amanye amakhansela e-EFF, e-ANC noma awe-NFP engahambisani nalo mfelandawonye avote ephikisa isiphakamiso.
Umasipala wakwaNongoma ungomunye womasipala abangu-29 abaphethwe i-IFP KwaZulu-Natal. Kulaba abayishumi kungenzeka bathathwe i-ANC kulandela ukubhidlika komfelandawonye we-IFP ne-EFF.
UNongoma ungaphansi kukaMasipala wesiFunda sase-Zululand uzishaya isifuba ngoxhaxha lwezindawo eziheha izivakashi okuhlanganisa nezigodlo eziyisithupha zobukhosi – yingakho unesiteketiso esithi – uMasipala weNdlunkulu yeSizwe samaZulu noma Ihlalankosi.
I-IFP ingase ilahlekelwe yiwo wonke amalungelo kahulumeni kulesi sifunda esinothe ngomlando.
Esithombeni esingenhla: IMeya ye-IFP kwaNongoma uMnu Albert Mncwango
Umthombo wesithombe: Isizindalwazi sikaMasipala wakwaNongoma