Lubhalwe ngu-Everson Luhanga
- Isikole samabanga aphansi i-Dkt Knak sibambe inkonzo yesikhumbuzo kaLesedi Maaboi (10), oshone ngemuva kokudla ukudla okulula okusolwa ukuthi bekunoshevu.
- UNgqongqoshe waseGauteng, uLebogang Maile, ufuna kuthathwe izinyathelo mayelana nokuphepha kokudla njengoba izakhamizi zifuna kube nokulawulwa okuqinile kwezipaza kule ndawo.
Isikole samabanga aphansi i-Dr Knak e-Alexandra sibe nenkonzo yesikhumbuzo kaLesedi Maaboi (10) oshone ngemuva kwezinsolo zokuthi udle ukudla okulula okunoshevu okufake unina nomfowabo esibhedlela.
Lo mfundi obefunda ibanga lesine ushonele emtholampilo iMasakhane ngoMgqibelo mhla zimbili kuLwezi. Umama wakhe (38), nomfowabo (4) balashwe esibhedlela i-Edenvale base bededelwa kuleli sonto. Ukushona kwalo mfundi kubathukuthelisile abantu base-Alexandra, izakhamuzi zifuna izipaza zithathelwe izinyathelo ezithile.
NgoLwesibili, ngemuva komhlangano obusehholo i-San Kopano, izakhamizi zimashele esiteshini samaphoyisa zifuna amaphoyisa azisize zixoshe abanikazi bezitolo abaphuma emazweni angaphandle.
Amaphoyisa aliqaphe ngeso lokhozi ilokishi, yize kubonakale sengathi amaphaphu asehlile ngoLwesithathu.
UNgqongqoshe wezeziMali eGauteng, uLebogang Maile, ovakashele umndeni oshonelwe ngoMsombuluko, unxuse ukuthi luthathelwe phezulu lolu daba ngemuva kwezigameko zakamuva zokudla okunoshevu.
“Kunenkinga uma kukhona ukudla okunoshevu emashalofini,” kusho uMaile. “Lokhu kudla kukhiqizwa ndawana thize, ngakho-ke kufanele siyibheke yonke imigudu singagcini ngokudla okusemashalofini kuphela.”
Ucele izakhamizi ukuthi zisebenzisane namaphoyisa nabahloli bezempilo abaphenya leli cala.
ULesedi uzongcwatshwa ngoMgqibelo mhla ziyisishiyagalolunye kuLwezi esigodini sase-Phiring, e-Burgersfort, e-Limpopo.
Esithombeni esingenhla: Isishoshovu uLinda Twala, owaziwa ngelika-Alex, uvakashele u-Joshua Maaboi kanye nomfana wakhe uRefentse (4) ophume esibhedlela ngemuva kokudla ukudla okulula okunoshevu.
Umthombo Wesithombe: Everson Luhanga