USbongile Nonyana ukulethela ezinohlonze zakamuva zobugebengu ezenzeka eNingizimu Afrika.
EMalahleni – Amaphoyisa adubule abulala abasolwa abahlanu abebesolwa ngokuyogqekeza i-ATM ngoLwesibili kwalimala oyedwa. Abasolwa bavulele ngenhlamvu ngemuva kokuba amaphoyisa ebavimbezele. La maphoyisa ebelandela umkhondo wabesilisa abayisithupha abebehamba nge-Toyota Hilux ngemuva kokulunywa indlebe ngetulo lokubhoma i-ATM. Amaphoyisa athole isibhamu sohlobo lwe-R5, isibhamu sokuzingela, izibhamu ezintathu ezincane kanye neziqhumane endaweni yesigameko. Kushaqwe neveni abebehamba ngayo.
KwaMbonambi – Kudutshulwe kwabulawa umshayeli obedlula ngemoto ngesikhathi kubanjwa imoto yemali inkunzi. Umufi ushaywe inhlamvu ebingahloselwe yena. Amaphoyisa avale umgwaqo u-Dune nhlangothi zombili ngesikhathi esaphenya.
EMbombela – Indoda yaseMpumalanga (24) ibanjwe inkunzi yadutshulwa yabulawa ngemuva komcimbi we-Summer Blaze enkundleni yezemidlalo iMbombela mhla zizinye kuZibandlela. Abesilisa ababili abebehlomile bahlasele u-Austin Snethemba Mashabane nomngani wakhe wesifazane endaweni yokupaka izimoto, baphuca owesifazane isikhwama sakhe nomakhalekhukhwini ngaphambi kokubulala uMashabane. Amaphoyisa ayaphenya kodwa abengakabophi muntu.
EQwaQwa – Amaphoyisa ase-Free State abophe abasolwa ababili ngokubulala ikhehla (74). Abalisa ababili abaneminyaka engu-18 nengu-37 ubudala baboshiwe kamuva bavela enkantolo ngecala lokubulala.
Umlimi uthole isidumbu sakhe simbozwe ngendwangu emnyama, eboshwe intamo nezandla ngocingo.
E-Middleburg – Obecele ukugitshezwa emotweni udubule wabulala izigebengu ezimbili kwezine ebezimhamba ngemoto yohlobo lwe-Hyundai Tucson. Abasolwa bambambe inkunzi base bema ku-ATM befuna ukukhipha imali. Umgibeli uye wakhipha isibhamu wadubula umshayeli nomgibeli. Abanye abasolwa ababili babalekile kodwa babuye baboshwa. Bazovela enkantolo maduze.
Esithombeni esingenhla: Amalambu amaphoyisa.
Umthombo wesithombe: Crime