USbongile Nonyana ubika kafishane izindaba zobugebengu ezenzeka eNingizimu Afrika yonkana.
E-Potchefstroom – Kuboshwe umlisa (29) ngecala lokubulala nokuthumba uNomsa Jass (26) owaduka ngomhlaka-25 kuNcwaba ephuma emsebenzini e-Potchefstroom. Isidumbu sakhe esesonakela sitholwe ehlathini eduze komgwaqo u-R501 e-Blybank, e-Carletonville. Umsolwa wase-Mozambique ubekwe icala lokubulala, ukuthumba nokubamba inkunzi. Uvele eNkantolo yeMantshi yase-Oberholzer ngesonto eledlule.
E-Hlogotlou – Amaphoyisa athungatha abasolwa abathinteka ecaleni lokubulala indoda (29) eshaywe amalungu omphakathi eyisola ngokweba. Yize amaphoyisa eyitakulile ekuhlaselweni le ndoda kodwa igcine ishonele esibhedlela.
E-Polokwane – Kuboshwe owesilisa (28) ngecala lokubulala nokuthumba owesilisa (63) ohola impesheni e-Polokwane. Umsolwa washisa isidumbu sikamufi, wasingcwaba, wabe esesakaza izinsalela zaso. Uboshwe e-Sunnyside, ePitoli, mhla zinhlanu kuMandulo, wavela eNkantolo yeMantshi yase-Motetema mhla ziyisishiyagalolunye kuMandulo. Icala lenzeka ngoNtulikazi ngo-2022.
E-Bushbuckridge – Kuboshwe ilungu leforamu yamaphoyisa omphakathi ngokususa isibhamu endaweni yesigameko lapho okudutshulwe kwabulawa owesifazane (25). Ubekwe icala lokwephula umthetho kanye nokutholakala nesibhamu esingekho emthethweni. Uvele eNkantolo yeMantshi yase-Bushbuckridge ngoMsombuluko.
E-Kimberley – Kuboshwe izigebengu ezintathu ebezihlomile e-Kimberley ngemuva kokuzama ukubamba inkunzi isitolo esidayisa utshwala e-Boshoff, e-Free State. Umnikazi wesitolo uphunyukile, abasolwa babaleka. Amaphoyisa athole izigebengu nesibhamu sohlobo lwe-9mm, izinhlamvu, i-balaclava, nezinto zokugqekeza. Abasolwa bazovela enkantolo maduze nje.
E-Komatipoort – Umshayeli wetekisi (37) uboshwe emngceleni wase-Lebombo ne-50 kg ye-heroin. Izidakamizwa bezifihlwe kuplastiki omnyama enqoleni yetekisi. Umsolwa uzovela eNkantolo yeMantshi yase-Komatipoort maduze nje.
Esithombeni esingenhla: Amaphoyisa.
Umthombo wesithombe: File