USbongile Nonyana ubika kafushane ngezobugebengu ezenzeka eNingizimu Afrika yonkana.
E-Bethal – INkantolo yesiFunda yase-Bethal eMpumalanga igwebe amadoda amane ngoLwesithathu ngamacala okudlwengula nokubulala. USunday Sibiya, 26, noMkhanyiseni Ncamu, 27 bagwetshwe odilikajele abathathu ngamacala abo, kanye nesigwebo esengeziwe ejele ngamanye amacala. UJaja Lephoto, 20, noPhumlani Masoka, 20 bagwetshwe iminyaka engu-20 umuntu emunye. Laba abane bayathinteka ekubulaweni kowesilisa (25) wase-Nigeria kanye nokudlwengula abesifazane ababili, abaneminyaka engu-27 nengu-35, ngoNhlangulana ngo-2022.
E-Bloemfontein – Amaphoyisa ase-Free State abophe umlisa (37) ngecala lokugebenga umuzi e-Bloemspruit. Utholwe nesibhamu esebiwe nezinye izinto ezebiwe esigodini sase-Makwane ngomhlaka-19 kuNcwaba. Umsolwa uboshwe ngoLwesihlanu, mhla ziyisithupha kuMandulo. Uzovela eNkantolo yeMantshi yase-Bloemfontein maduze.
E-Sekhukhune – Amaphoyisa ase-Sekhukhune abophe abalisa amathathu, abaneminyaka engu-19 kuya kwengu-23 ubudala, ngokutholakala nemoto yohlobo lwe-Toyota Aygo eyebiwe endaweni yase-Motetema. Abasolwa bavele eNkantolo yeMantshi yaseNebo ngamacala okweba imoto nokutholakala nemoto eyebiwe.
E-Standerton – Abasebenzi endaweni yokulahla udoti bathole into enyantisayo ngoLwesine ngesonto eledlule ngesikhathi bethola isidumbu sengane kupulasitiki. Isidumbu basithole ngemuva nje kokuthi iloli likamasipala lichithe imfucuza.
E-Sekhukhune – Amaphoyisa ase-Tunatse, e-Limpopo afuna uTetelo William Malatjie (15). Wagcina ukubonakala ngomhlaka–27 kuNtulikazi. Wasuka ekhaya kubo e-Bothashoek egqoke ihembe eliluhlaza okwesibhakabhaka, ijezi eliluhlaza kanye nophaca.
E-East London – Ummeli uMasixole Bangiso uboshelwe ukweba u-R500 000 we-Road Accident Fund. Imali kwakungeyekhasimende lakhe. Uvele eNkantolo yeMantshi yase-East London ngoMsombuluko wanikezwa ibheyili ka-R4,000. Uzophinde avele enkantolo ngomhlaka-11 kuMfumfu.
Esithombeni esingenhla : Inkantolo.
Umthombo: Ifayela