USbongile Nonyana wethula kafushane izindaba zobugebengu ezenzeka eNingizimu Afrika yonkana.
E-Phamong – Amaphoyisa ase-Free State abophe abasolwa ababili ngecala lokubulala ngesihluku izelamani ezimbili e-Phamong. Isidumbu sikaPheello Mosebekoa (32) sitholwe endlini sinamanxeba okugwazwa kwisingenhla somzimba wakhe. Umfowabo, uTeboho Lesenyeho (31) utholwe kwamakhelwane enamanxeba okugwazwa esihlathini nasemqaleni. Lezi zelamani zihlaselwe endlini yazo ngamadoda amabili abehlome ngemimese nocelemba.
E-Polokwane – INkantolo eNkulu yase-Polokwane ilahle uTlou James Mashita, (54) yamgweba iminyaka engu-15 ebhadla ejele ngokubulala ngesihluku intombi yakhe, uNkedu Merriam Vilakazi (43). Isidumbu sikaVilakazi satholwa indodakazi yakhe ngoMandulo wango-2016 esigodini sase-Tshamashansi, esifundeni sase-Waterberg yabe sebyiika udaba emaphoyiseni.
E-Botshabelo – Amaphoyisa ase-Botshabelo acela umphakathi ukuthi usize ekutholeni uPesa Pheko (37) oduke mhlaka-10 kuNtulikazi. Ugcine ukubonakala ephuma emzini wakhe osesigcemeni sakwa-L eyogibela izithuthi zomphakathi eziya e-Bloemfontein ukuyobona udokotela esibhedlela. UPheko ubegqoke ijakhethi ende eluhlaza, ibhulukwe elimnyama, amateku amnyama kanye nesigqoko esimpunga.
E-Mahwelereng – Amaphoyisa ase-Limpopo abophe owesilisa (40) ngecala lokubulala isalukazi e-Mahwelereng ngeSonto. Owesifazane utholwe eboshiwe ngaphandle komuzi wakhe enamanxeba okugwazwa. Umsolwa obehlala eduze nesisulu, uzovela eNkantolo yeMantshi yase-Mahwelereng ngoLwesibili.
KwaMhlanga – Amaphoyisa aKwaMhlanga abophe abasolwa abathathu ngecala lokuhlasela amalungu omphakathi, bawantshontshele ama-plasma TV, omakhalekhukhwini kanye nemali. Emasontweni amabili edlule laba abathathu bebenza amacala e-Mloto, e-Mafishani, e-RDP Section, eZakheni nakwezinye izindawo zaKwaMhlanga. Bavele enkantolo kodwa banqatshelwa ibheyili.
Esithombeni esingenhla: Amalambu amaphoyisa.
Umthombo wesithombe: File