USbongile Nonyana ukulethela ezakamuva ezinohlonze zobugebengu ezenzeka eNingizimu Afrika.
E-Namahadi – Amaphoyisa ase-Free State azingela ababulali abadubule babulala amaphoyisa amabili ngoMgqibelo ebusuku, mhla zizine kuMasingana. La maphoyisa ebephendula isikhalo mayelana nesigameko sokugetshengwa komuzi esigodini sase-Mangaung. Bathe befika kwabaleka izigebengu ezimbili amaphoyisa azijaha. Ngesikhathi bejahwa, esinye isigebengu sivimbe imoto yamaphoyisa sadubula umshayeli entanyeni, washona. Ngesikhathi amanye amaphoyisa eyobheka umuzi, kuphume esinye isigebengu sadubula. Sibulale iphoyisa elilodwa sathatha isibhamu sephoyisa.
E-Barberton – Amaphoyisa abophe amadoda amabili aneminyaka engu-33 nengu-39 ngeSonto, mhla zinhlanu ngokuphatha iziqhumane. Amaphoyisa abamise ku-R83 ngase-Consort Mine ngesikhathi kuqhubeka i-Operation Vala Umgodi. Amaphoyisa athole ojeke kanye nemali engu-R10 000. Omunye wabasolwa ubevele engaphandle ngebheyili ngokuba nesibhamu esingekho emthethweni ngesikhathi eboshwa. Kumele avele eNkantolo yeMantshi yase-Barberton ngomhlaka-30 kuMasingana.
E-Bultfontein – Amaphoyisa ase-Bultfontein aphenya icala lokubulawa kwesalukazi (86) esitholwe sishonile emzini waso. NgoMgqibelo mhla zizine, bathole isidumbu sakhe endlini yangasese engaphandle sidindilize egazini. Ubegwazwe kaningi emhlane nasentanyeni. Ubesevele eshonile ngesikhathi kufika amaphoyisa. Amaphoyisa awazi ukuthi ubulaweleni.
E-Meadowdale – Izigebengu zibulale umfanyana (6) ngesikhathi kugetshengwa e-McDonald’s ngoLwesihlanu mhla zinthathu kuMasingana. Izigebengu ziqale za-oda ukudla kodwa zabuye zahoxisa i-oda. Esinye isigebengu singene ngefasitela sasongela abasebenzi ngesikhathi sifuna imali ngenkani. Kulandele isigebengu sesibili esifike sadubula phakathi kule ndawo yokudlela. Bathathe ibhokisi lemali babaleka. Umshayeli wemoto ube esemisa umndeni obuhamba ngemoto ebisemuva kwakhe. Uye wabagebenga wadubula nengane yabo eneminyaka eyisithupha ubudala. Amaphoyisa abengakabophi muntu.
E-Giyani – Amaphoyisa abophe owesilisa (26) ngokudlwengula owesifazane (40) esigodini sase-Skhimini. NgoLwesithathu, mhla zizinye kuMasingana umsolwa uye wazama ukukhuluma nomgilwa ngesikhathi esendleleni ebheke ekhaya. Ngesikhathi enqaba ukukhuluma nomsolwa, uye wamshaya futhi wamdlwengula. Amaphoyisa ase-Mopani ambophile, wabe esevela eNkantolo yeMantshi yase-Giyani mhla ziyisithupha kuMasingana.
Esithombeni esingenhla: Amalambu amaphoyisa.
Umthombo wesithombe: File