USbongile Nonyana ukulethela ezakamuva ezinohlonze zobugebengu ezenzeka eNingizimu Afrika
E-Nelspruit – Amaphoyisa aseMpumalanga abophe abantu abahlanu abaneminyaka ephakathi kwengu-29 nengu-40 ngokubulala uLieutenant Colonel Piet Pretorius e-Ermelo. Amaphoyisa athole imoto yabasolwa eshile ngase-Extension 7. UPretorius, obehola i-Vehicle Identification Unit, udutshulwe wabulawa esemotweni yakhe yamaphoyisa ngoLwesine, ngomhlaka-16 kuMasingana. Umbulali ubaleke ngemoto emhlophe.
E-Polokwane – Inkantolo yase-Mokopane igwebe uMalose Jimmy Masosa (38) iminyaka engu-18 ebhadla ejele ngokubulala unkosikazi wakhe, uMokgaetjie Lydia Tshabi (37). Lezi zithandani zalwa ngaphandle kwase-Tseu Tavern e-Mapela Danisani phakathi kwamabili ngomhlaka-11 kuNhlaba nyakenye. Ngesikhathi besendleleni ebheke ekhaya, uMasosa uye wagwaza umkakhe amanxeba amaningi. Ngesikhathi umfowabo kamgilwa ezama ukusiza, uMasosa uye wamxosha. Wabe esemhudulela emzini oseduze wamshiya lapho eshonile.
E-Virginia – Amaphoyisa ase-Free State abophe owesilisa (33) ngoLwesibili ngecala lokudlwengula nokuzama ukubulala intombazane (2). Amaphoyisa afice le ngane ilimele kabi imbozwe ngejakhethi ngemuva kokuthi kukhona obike ngokuhlukumezeka kwengane. Odokotela bakuqinisekisile ukuthi idlwenguliwe. Umsolwa uvele enkantolo ngoLwesithathu kanti uzohlala ejele kuze kube usuku lwakhe olulandelayo lokuya enkantolo ngomhlaka-22 kuMasingana.
E-Polokwane – Amaphoyisa abophe owesilisa (42) ngecala lokudlwengula ngoLwesine. Owesifazane (20), ubeya endaweni yokucima ukoma nomngani womnikazi wendawo endaweni yase-Ladanna Industrial ngase-Polokwane. Umsolwa ube esemdlwengula emotweni yakhe. Amaphoyisa abophe umsolwa ngoLwesihlanu emzini ose-Zone 5H. Uvele enkantolo yase-Seshego ngoMsombuluko.
E-Sekhukhune – Amaphoyisa ase-Limpopo abambe amadoda amabili edayisa izidakamizwa erenki yamatekisi e-Groblersdal ngemuva kokulunywa indlebe. Bathole owesilisa wokuqala (31) ephethe i-rock, i-nyaope, insangu kanye nemali engu-R656. Baphinde babamba omunye wesilisa (53) ephethe ugwayi ongekho emthethweni i-Remington Gold. Bobabili bazovela enkantolo maduze.
Esithombeni esingenhla: Amalambu amaphoyisa.
Umthombo wesithombe: File