USbongile Nonyana ukulethela ezakamuva zobugebengu ezinohlonze zaseNingizimu Afrika
E-Nelspruit: Owesilisa oneminyaka engu-37 ubudala uboshwe ngamaphoyisa aseMpumalanga ephethe iziqhumane ngoLwesibili, mhlaka-25 kuNdasa.
Amaphoyisa abone imoto yohlobo lwe-Toyota Avanza emhlophe ebinabagibeli abathathu ku-Three Sisters Road acela ukuyisesha. Bathole isikhwama se-Nike esiluhlaza kumsolwa ozibize ngoSabelo Nkosi wase-Kamashayana. Ugcinwe esitokisini yiNkantolo yeMantshi yase-Barberton ngomhlaka-26 kuNdasa 2025, ngokutholakala neziqhumane. Icala lakhe lihlehliselwe umhla ziyisikhombisa kuMbasa 2025 kuyona le nkantolo ukuze afake isicelo sebheyili.
E-Polokwane: Amaphoyisa ase-Limpopo athungatha umsolwa owabulala ngesihluku owesifazane wase emboza isidumbu sakhe ngopulasitiki. Amaphoyisa alunywe indlebe ngokutholakala kabuhlungu kwesidumbu sowesifazane esishonile, esitholwe sigoqwe ngopulasitiki ngaphansi kwebhuloho ngeSonto, mhlaka-23 kuNdasa 2025 ngabo-13:10.
Umufi utholwe ngumuntu obedlula ngendlela.
Imbangela yokubulawa kwakhe ibingakaziwa okwamanje, kuzocutshungulwa isidumbu ukuze kutholakale imbangela yokufa kwakhe.
E-Bushbuckridge: Amaphoyisa ase-Bushbuckridge acela usizo lomphakathi ukuze kutholakale uBerry Tlyselane Madalane (27), wase-Dwarsloop Phase Two, nowaduka kusukela ngomhlaka-14 kuNdasa. Ugcine ukubonakala ngezithuba zabo-21:00 ehleli nomama wakhe endlini yokuphumula bebukela umabonakude.
Unina wayolala, wamshiya lapho. Ngakusasa ekuseni, wavuka wabona ukuthi indodana yakhe ayikho endlini.
Wabheka wathola ukuthi imoto yakhe, i-Mercedes-Benz C180 emhlophe enenombolo yokubhalisa i-KNT 921 MP, nayo ayikho. Kunxuswa noma ngabe ngubani ongaba nolwazi ngokumthola
ukuthi athinte uWO Nicole Setwane ku-079 391 9384.
E-Komatipoort: Amaphoyisa ase-Komatipoort abophe abasolwa abathathu, abaneminyaka ephakathi kuka-52 no-56, ngecala lokuzama ukubulala. Kubasolwa ababoshiwe, ababili bangamaphoyisa kanti oyedwa ubeyilungu le-SANDF. NgeSonto, mhlaka-23 kuNdasa, abantu abayisishiyagalolunye behlome ngezikhonkwane nezinye izinto bangena endaweni yokuhlala bathola owesifazane oneminyaka engu-45 ubudala, base beqala ukudala uthuthuva nokulimaza umuzi wakhe. Ummangali ukwazile ukubona la maphoyisa amabili asebenza kuMasipala wase-Mbombela. Umufi ushaywe wadutshulwa. Uthole ukulimala esandleni sokudla. Abasolwa bavele eNkantolo yeMantshi yase-Komatipoort ngoMsombuluko, mhlaka-24 kuNdasa, babhekene necala lokuzama ukubulala kanye nokwephula incwadi yokuvikela.
Esithombeni esingenhla: Imoto yamaphoyisa.
Umthombo wesithombe: File