UCelani Sikhakhane ubika kafushane ezinohlonze esifundazweni.
EThekwini – I-Passenger Rail Agency of South Africa (Prasa) izothutha abalandeli ukuya kowamanqamu we-MTN8 ozobaMoses Mabhida Stadium, eThekwini, ngoMgqibelo mahhala. Izitimela zizobe ziliqhamukisa eMlazi, e-Winkelspruit, KwaMashu, e-Cato Ridge, e-Pinetown, nase-Crossmore. Uma sezifike eThekwini, abalandeli bazophinde bathuthwe besuka esiteshini saseThekwini bayise eMoses Mabhida njalo ngemizuzu engu-15. Abalandeli bangapaka izimoto zabo esiteshini saseMlazi, KwaMnyandu Mall, naseThekwini ukuze basebenzise izitimela.
KwaNongoma – Abaculi abadumile bevangeli bavakashele idolobha i-Monarch ukuyohlela i-Mayine Gospel Crossover Festival ezayo, ehlelelwe umhlaka-31 kuZibandlela. Ithimba le-Mayine beliseSontweni lamaWeseli KwaNongoma, lijabulisa ibandla ngomculo nangezwi leNkosi.
EMgungundlovu – I-EFF e-KZN ibambe umbhikisho ngokubambisana nabahlanzi nonogada, abafuna ukuthi baqashwe ngokugcwele eminyangweni kahulumeni e-KZN. USihlalo we-EFF eKZN, uMnuz Mongezi Thwala, ubehola le mashi.
EMlazi – I-DA isiqalile ukuhlola ukulungela ukuhlolwa kukamatikuletsheni kuzo zonke izifunda zase-KZN. Okhulumela i-DA kwezemfundo, uMnuz Sakhile Mngadi, uqale ukuvakasha eMlazi, ehambela izikole ezinemiphumela engemihle kamatikuletsheni ka-2023 ukuze kutholakale izinkinga ezimqoka ezidala lokhu.
Esithombeni ngenhla: I-Prasa izohlinzeka ngezitimela zamahhala emdlalweni amanqamu we-MTN8 ozoba seMoses Mabhida Stadium, eThekwini.
Umthombo: I-Prasa