Ezifingqiwe zaseKZN: Abaholi be-ANC baphendukele embonini yamatekisi ukuze bathole ukwesekwa

UCelani Sikhakhane ukulethela ezakamuva ezinohlonze ezivela KwaZulu-Natal.

EMgungundlovu – Umholi we-ANC KwaZulu-Natal onguNobhala wesifundazwe uBheki Mtolo, uhlangane nososeshini bamatekisi baseMgungundlovu District (esifundeni iMoses Mabhida) ngoLwesibili. Ujoyinwe ngumkhulumeli we-ANC esifundazweni uMnuz Mafika Mndebele noNobhala wesifunda iMoses Mabhida uMnuz Samora Ndlovu. Inhloso yalokhu kuxoxisana bekuwukuqinisa ubudlelwane phakathi kwe-ANC nemboni yamatekisi, ukwazisa imboni ngentuthuko yakamuva yezepolitiki, kanye nokuhlonipha indima ebalulekile edlalwa yilo mkhakha ekuxhumaniseni imiphakathi nasekuqhubeleni phambili ukuthuthukiswa komnotho wendawo.

ENtuzuma – INkantolo yesiFunda eNtuzuma igwebe uSiyabonga Prince Cele (23), udilikajele neminyaka engu-25 ebhadla ejele, ngelokudlwengula, ukubamba inkunzi esebenzisa isihluku, ukuzama ukubulala nokuthumba ngamacala awenza ngoNdasa ka-2022 endaweni yaseNanda nase-Phoenix. Mhlaka-12 kuNdasa ngonyaka ka-2022, uCele nayehamba nabo baduna imoto eNanda. Ummangali obesebenza njengomshayeli we-metered car, wayesehlisa umgibeli ngesikhathi uCele nayehamba nabo befika kumshayeli bephethe imimmese nezibhamu. Bamshaya bamkhipha emotweni bahamba. Babe sebezithela kummangali wesifazane owayehamba emgwaqeni. Bambamba bamfaka esihlalweni esingemuva emotweni base beyamdlwengula.

EBhambayi – Uphenyo lwamaphoyisa ase-Swift seluholele ekuboshweni kwabasolwa abangu-12 ngamacala okubulala abantu abahlanu ababulawa ngesihluku ezinkundleni zemidlalo eBhambayi eNanda ngoLwesihlanu olwedlule. Kusenziwa inqubo ngabasolwa nangemininingwane yabo kanjalo nokuvela kwabo okokuqala enkantolo futhi bazokwaziwa ngokuhamba kwesikhathi. Abasolwa kukholakala ukuthi bangamalungu eforamu yomphakathi endaweni kanti kungase kuboshwe abanye.

Esithombeni esingenhla: UNobhala we-ANC eKZN uMnuz Bheki Mtolo noNobhala wesifunda iMoses Mabhida uMnuz Samora Ndlovu bahlangane nemboni yamatekisi ngenhloso yokuvuselela ukwesekwa kwe-ANC KwaZulu-Natal.

Umthombo: Sithunyelwe 

Izihloko zakamuva