USihle Mavuso ukulethela kafushane izindaba zansuku zonke esifundazweni
E-Nkandla – Umlilo wequbula ngesonto eledlule ucekele phansi imizi engaphezu kuka-100 washisa wonke amadlelo eNkandla. IMeya yaseNkandla uMbhekiseni Biyela uthe abalimi manje badinga usizo lokuphakela imfuyo yabo. Uthe abazingeli, amasela, nabantu abadakiwe yibo abaqale umlilo.
KwaNongoma – USomlomo kamasipala waKwaNongoma ucele umphakathi oseduze nesikole iSihlahlasenkosi High School ukuthi uyeke ukulwa, uxazulule izinkinga ngokuthula. UBabongile Sithole ukunxuse lokhu ngemuva kokuvakashela esikoleni, lapho impi iholele ekutheni kugwazwe kushone umfundi kamatikuletsheni.
ELadysmith – Ezinye izindawo zaseMnambithi zicela amanzi ahlanzekile kumasipala ophethwe yi-IFP esifundeni sasoThukela. Izakhamizi zaKwaHlathi zivale imigwaqo nezikole zibhikishela ukuhlinzekwa kwezidingo ezingcono zamanzi, umbhikisho uqhubeke ngoLwesibili. Sekuphele izinyanga le ndawo inezinkinga zamanzi. Umasipala wesifunda uthi umatasatasa ukulungisa izinkinga zamanzi.
E-Port Shepstone – Isiteleka samatekisi ePort Shepstone siphenduke saba nodlame ngoLwesibili. Izimoto eziku-N2 zikhandwe ngamatshe, enye yashiswa. Imigwaqo eduzane ne-Esayidi ibivalwe ngamaloli okudale isiminyaminya amahora amaningi. Kubizwe amaphoyisa ukuthi azolungisa isimo. Abashayeli bamatekisi babhikishela ukuboshwa kwezimoto zabo.
E-Thekwini– I-DA ilindele ukuthi inkulumo yesimo sesifundazwe kaNdunankulu uThami Ntuli izokwethula izinhlelo zokulungisa umnotho nokudala amathuba emisebenzi. I-DA iphinde yethemba ukuthi uNtuli uzobhekana nezinkinga ezibalulekile zenhlalalakahle nomnotho. Uzokwethula inkulumo yakhe eMgungundlovu.
Esithombeni esingenhla: Imeya yaseNkandla ithi ukusha komlilo wequbula kushiye inqwaba yomonakalo.
Umthombo: USihle Mavuso