USihle Mavuso wethula ezinohlonze zesifundazwe kafushane.
E-Newcastle – Ushintsho olusha enkampanini i-ArcelorMittal yase-Newcastle enyakatho yesifundazwe luvele ngemuva kokuthi inkampani imemezele ukuvalwa kwayo kuzomiswa. Le nkampani ithe ibheka izindlela zokusindisa ukusebenza kwayo. Le nkampani bekumele ivalwe maphakathi nonyaka, obekuzoholela ekulahlekeni kwemisebenzi ebalelwa ku-4 000 obekuzocekela phansi idolobha lase-Newcastle. Inkampani izoqhubeka nokusebenza kuze kube yizinyanga eziyisithupha.
E-Babanango – AbakwaButhelezi eBabanango ngasoLundi bazohlangana eMcakwini ukubungaza uSuku lweNkosi uPhungashe lwaminyaka yonke ngoMgqibelo mhlaka-6 kuNhlangulana. Lo mcimbi kulindeleke ukuthi uhanjelwe abaholi abaningi besizwe sakwaButhelezi abaqavile njengoMfundisi Thulasizwe Buthelezi onguNgqongqoshe wezokuBusa ngokuBambisana neziNdaba zoMdabu ophinde abe ngundunankulu wesizwe samaZulu. Inkosi uPhungashe wayengumholi onamandla wesizwe sakwaButhelezi ngeminyaka yango-1800. Wabulawa yinkosi uShaka ngesikhathi inkosi iqala umkhankaso wokunqoba kwasani, iqinisa amandla ayo ebukhosini bakwaZulu.
E-Mzimkhulu – I-KwaZulu-Natal iqhubekela phambili nezinhlelo zayo zokuguqula izindawo zokufuya izimvu esifundeni i-Harry Gwala zibe yisizinda esikhiqiza uvolo. NgoLwesine, uhulumeni wesifundazwe uzonikezela ngohlobo lwezimvu i-Merino kuzinhlangano ezingu-14 eziyingxenye ekukhiqizeni uvolo. Ezinye izinhlangano zizothola ingqalasizinda yokugcina uvolo bazo buphephile futhi bomile ngaphambi kokubuthumela ezimakethe zaphesheya kwezilwandle.
E-Estcourt – Uhlelo lwamanzi i-Vimbukhalo osekunesikhathi lulindelwe eduze kwedolobha eliKwaZulu-Natal Midlands, i-Estcourt, lugunyazwe ngokusemthethweni. Lolu hlelo olubiza u-R47 million (iVimbukhalo-3 no-4) oluxhaswe umasipala wesifunda sasoThukela, kulindeleke ukuthi luthathe isikhathi esingangonyaka ukuphothulwa kanti luzohlinzeka ngamanzi kuzo zonke izindawo eziseduze nedolobha lase-Estcourt ezivame ukungabi nawo amanzi izinsuku, okubuye kuqubule imibhikisho yokulethwa kwezidingongqangi enodlame.
E-Thekwini – I-DA KwaZulu-Natal ihalalisele uNgqongqoshe omusha wezemiSebenzi yoMphakathi neNgqalasizinda, uDean Macpherson, ophuma ezinhlakeni zayo. Iqembu lithe uletha isipiliyoni esiningi futhi uthatha isikhundla sezepolitiki ngesikhathi lapho abantu baseNingizimu Afrika befuna khona izimpendulo kulandela iminyaka yokungalethwa kwezidingonqangi. “Izwe lethu kumele liqale ukusebenza futhi, kanti lokhu kungenzeka kuphela ngobuholi obusebenzayo nobunekhono,” kusho iqembu ngemuva kokufungiswa kwakhe.
Esithombeni ngenhla: I-ArcelorMittal izama ukuhlenga ukusebenza nemisebenzi emphakathini wase-Newcastle.
Umthombo: ArcelorMittal