USihle Mavuso ukulethela kafushane ezinohlonze KwaZulu-Natal.
KwaNongoma – UNgqongqoshe wezokuThuthukiswa koMphakathi, uMbali Shinga, uzofika KwaNongoma kusasa ngoLwesibili ukuyohlangana nomndeni (isibongo sawo esigodliwe ukuvikela abagilwa) okusolakala ukuthi amantombazanyana akhona amathathu adlwengulwe yisihlobo sawo, asala nezibazi zokuhlumezeka emoyeni. La mantombazanyana aneminyaka emine, emihlanu neneminyaka eyisikhombisa kanti isihlobo kuthiwa siwadlwengule ngasekuqaleni konyaka. UShinga uzohola ithimba losonhlalakahle.
E-Ladysmith – Inhlangano yamatekisi i-Klipriver Taxi Association isihoxise isiteleka obekumele siqale namhlanje ngokukhipha amatekisi emgwaqeni. Abashayeli bamatekisi bebefuna ukuzwakalisa ulaka labo mayelana nesigameko sakamuva sokubulawa kukaMartin Ndlovu – umshayeli obulawe ngoMgqibelo ekuseni eya emsebenzini. Ukushona kwakhe kukholakala ukuthi kuhlobene nodlame lwamatekisi oluqhubekayo endaweni oseludlule nemiphefumulo yabashayeli, abanikazi bamatekisi kanye nezihlobo zabo.
E-Mkhomazi – UNgqongqoshe wezeMisebenzi yoMphakathi neNgqalasizinda uDean Macpershon kusasa uzovakashela i-Lower Umkhomazi Bulk Water Scheme ukuze ahlole inqubekelaphambili yayo. Lo msebenzi, okuhloswe ngawo ukuhlinzeka ngamanzi ezindaweni zasemadolobheni amakhulu njengaseThekwini, e-Port Shepstone naseMgungundlovu, usuphazanyiswe izikhathi eziningi izigebengu zezokwakha eziqola abahlinzeki bezinsiza. Ezinye izikhulu zaseMngeni-uThukela Water ziyasongelwa ngenxa yokwenqaba ukuthobela ingcindezi yezigebengu.
E-Colenso – Umasipala wesifunda sasoThukela uthi ukuhlolwa okusha endaweni yokuhlanza amanzi e-Bergville nase-Colenso kukhombisile ukuthi ayikho i-e-coli njengoba bekucatshangwa phambilini. Umasipala uthi ukushona kwezinhlanzi e-Bergville kudalwe ukushisa kakhulu, hhayi ukungcola. Ngenxa yalokhu, isaziso esikhishwe kubahlali balezi zindawo ezimbili sokuthi babilise amanzi ngaphambi kokuba bawasebenzise sesihoxisiwe.
E-Thekwini – I-SAPS ithi ngenyanga edlule iyodwa kushaqwe izibhamu ezingekho emthethweni ezingu-313 ngesikhathi kugaselwa ezindaweni ezehlukene. Emkhankasweni wokugasela ezindaweni kutholakale izinhlamvu ezingu-5 000 kwabanjwa abasolwa abangu-11 003. Kulaba basolwa, abangu-191 bebefunelwa amacala okubulala kanti abangu-204 bebefunelwa ukudlwengula; abangu-45 kulaba basolwa bebefunelwa amacala okugebenga amabhizinisi kanti abangu-55 kubo bebefunelwa ukugebenga ezindlini.