USihle Mavuso wethula ezinohlonze zesifundazwe kafushane.
EThekwini – I-National Education, Health and Allied Workers Union (Nehawu) isitshele abaphathi be-Durban University of Technology ukuthi ayihambisani nokudilizwa kwabasebenzi okuzokwenziwa yilesi sikhungo. Inyunyana ithi asikho isizathu esibambekayo sokwenza lokho njengoba uhlelo lokuhlela kabusha lungakaphothulwa. Ukudilizwa kwabasebenzi okuhleliwe kulindeleke ukuthi kuthinte abasebenzi ababalelwa ku-300. Inyunyana izokhuluma noMkhandlu weNyuvesi ngenhloso yokunqanda ukudilizwa kwabasebenzi.
E-Wentworth – Uphiko lwabasebenzi beqembu loMkhonto weSizwe (MK) selungenelele ukuxazulula inkinga ebhekene nabasebenzi abebesebenza esibhedlela iKing Dinuzulu, e-Wentworth, ukuze babuyele emsebenzini. Abasebenzi abangu-60 baqashwa yinkampani ezimele ukuthi benze imisebenzi ejwayelekile esibhedlela. Nokho kuthiwa batshelwe ukuthi izinkontileka zabo seziphelelwe yisikhathi futhi sekuqashwe abasha. Iqembu le-MK lithe lingenelele ngemuva kokuzwa ukuthi elinye lamakhansela ale ndawo kuthiwa liphoqe inkampani ezimele ukuthi idilize abasebenzi yase ivala izikhala zabo ngabantu abazolethwa yilo. Umhlangano phakathi kweqembu nabaphathi besibhedlela obekufanele ube ngoLwesine, usuhlehliselwe isonto elizayo.
EThekwini — Umasipala weTheku ophethwe yi-ANC uthi usuqalile ukususa izingqwembe zokhetho ezingasuswanga ngamaqembu ezepolitiki njengoba umnqamulajuqu walokho ubungomhlaka-30 kuNhlangulana 2024. I-General Advertising Branch njengamanje yenza umsebenzi wokususa zonke izingqwembe ezifakwe ezigxotsheni zikagesi kuyo yonke ingqalasizinda. Umasipala uzokhokhisa inhlawulo ka-R1,193 ngoqwembe ngalunye olususwe egameni lamaqembu epolitiki.
E-Howick – Umasipala waseMngeni ophethwe yi-DA uthi isinqumo sawo sokunganwebi isikhathi sokuqashisa izimoto ezingu-14 eziqashwe esikhungweni sezimali ngoba ukuzithenga kuzokonga imali engango-R2.4-million ngonyaka. NgoLwesine, umasipala umemezele ukuthi lezi zimoto zizosetshenziselwa ukuqoqa udoti, ukusika utshani, nokuthuthwa kwabasebenzi phakathi kweminye imisebenzi. Izimoto zihlanganisa amaveni, ikhumbi, namaloli amabili athutha imfucuza.
EThekwini – I-DA engaphansi kwe-ANC eThekwini ifuna izimpendulo ngemuva kwemibiko yokuthi idolobha lakhokha u-R9-million kumhlinzeki wezindlu zangasese ezingasebenzi. Ngokombiko umhlinzeki wezinsiza unikezwe umsebenzi wokuhlinzeka ngezindlu zangasese kanye namashawa okugeza endaweni yokukhosela abantu abangenamakhaya ngase-Durban Station. I-DA ithi kuyichilo ukuthi le nkampani isenenkontileka nedolobha yize ikhokhelwe imali ebabazekayo ngaphandle kokwenza umsebenzi.
Esithombeni ngenhla: I-Durban University of Technology kuthiwa ihlela ukudiliza abasebenzi ababalelwa ku-300.
Umthombo: Facebook