Joseph Chirume
Inkampani yase-Zimbabwe yokudla okusheshayo isebenzise isigameko sangempelasonto ukuzimaketha.
Ngenkathi uChris Rock esazikhotha amanxeba ngemuva kokuthola ulabhabha wempama kuma-Oscars, inkampani yokudla okusheshayo yase-Zimbabwe i-Mambo’s Chicken isebenzise okwenzeke ngempelasonto ukumaketha ukudla kwayo ngosuku olulandelayo.
Imenyu inesihloko esithi “Ube nempelasonto e-Rocky? Lokhu kuzoshaya kanzima.”
Ipuleti elinenkukhu nepapa elinepuleti lamasaladi ababayo eceleni, ngokushesha sekuyintandokazi yabaningi.
Ngesikhathi uWill Smith esukuma ecasukile futhi eya endaweni yesikhulumi ukuze ashaye uRock ngenxa yehlaya alenze ngesimo sokulahlekelwa izinwele sikankosikazi wakhe uJada Pinkett Smith, ukudla okumnandi kwenkukhu okugqugquzelayo cishe bekuyinto yokugcina ayecabanga ukuthi izovela ezenzweni zakhe.
I-Mambo’s Chicken ayikwazanga ukulinda ukwenza imenyu ehambisana nolabhabha wempama, ifaka umkhiqizo wokumaketha ofana nowakwa-Nando’s eNingizimu Afrika.
Ikhasimende elijwayelekile uRejoice Muronzi uthe “Mambo’s Chicken, yinina enimakethayo ngesikhathi ezinye izinkampani zizama ukudayisa.”
Khonamanjalo uTyron Makwarimba uncome nakakhulu, ethi “INkosi mayiniphe ibhizinisi elengeziwe ngoba nibeke ezokumaketha kwelinye izinga.”
I-Mambo Chicken ayiqali ukuba ngundabamlonyeni.
Isikhangiso sayo sakamuva sika-ayisikhilimu sihlukanise isizwe. Abantu abaningi abasivumanga isithombe socansi sowesifazane evula umlomo wakhe wonke ngesikhathi ukhilimu kashokoledi wehla ezindebeni zakhe zomlomo ebe ekhotha ikhoni yekhilimu.
Abantu abaningi bakuchaze njengokunganambitheki nokucwasa ngokobulili.
Ikhasimende elijwayelekile uChenai Mhaku uncome le nkampani ngokubhuqa nokuletha ithemba nohleko ezweni elilwa nokuntuleka kwemisebenzi kanye nokwehla kwamandla emali.
Utshele i-Scrolla.Africa ukuthi “Bayakwazi ukwethula imikhiqizo yabo. Bahlezi bephambili kunabanye. Imenyu yabo ihlezi ifana kodwa banendlela ejabulisayo yokwethula ukudla kwabo emphakathini.”