Kabelo Tlhabanelo
Abahlali base-Harrismith abathukuthele badale isiphithiphithi emgwaqeni kazwelonke u-N3, uphethiloli uqhumise iloli elilodwa kwathi elinye lawa ngesikhathi lizama ukubalekela lesi sibhicongo.
Amaphoyisa ase-Free State abophe abasolwa abayisithupha kanti asaqhubeka nokuqapha isimo ezingxenyeni ezingaphakathi naseduzane ne-Harrismith eduze kuka-N3.
Lesi sigameko senzeke ngemuva kosuku nje imoto kaNdunankulu wase-Free State uSisi Ntombela ishaywe ngamatshe, ngenkathi esinda ngokulambisa olakeni lwababhikishi.
Abahlali base-Tshiame, e-Khalanyoni nase-Makgolokweng bafuna ukuthi idolobha labo lisuswe kuMasipala we-Maluti a Phofung.
Umhlali obhikishayo uvikela okwenziwa ngababhikishi, ekhombisa ukuthi udlame olwenziwa ngomhla ziyi-16 kuNhlangulana ngowezi-1976 lwalufanelekile, futhi lwaba nomthelela omuhle.
“Lesi sigameko sabulala abantu kodwa lokho akuyona inhloso yethu. Kodwa sizimisele ngokucekela phansi impahla ukuze sithole imiphumela esiyifunayo,” kusho lo mbhikisho.
“UMengameli wethule izinga lesithathu ezweni. Besilokhu sibhikisha kusukela ekupheleni kukaNhlaba futhi sinqume ukuthi udlame lwethu silukhuphulele kuzinga lesithathu.”
Omunye umbhikishi uthe bebengakaboni lutho olwenzelwa abahlali ngumasipala.
“Sizobhikisha kuze kube wukuthi uMengameli uRamaphosa uyeza uzosilalela.”
Abahlali bathi ukushiswa kweloli bekuyisingeniso nje.
Abashayeli abalimalanga. I-Scrolla.Africa asitholanga noyedwa ukuba aphawule.
Iphoyisa ebelisendaweni yesehlakalo lithe basebenze kanzima ukuzama ukunqanda abahlali.
“Ngiyaqala ukubona abantu abangazesabi izinhlamvu zenjoloba. Isimo sishubile impela kodwa abesilisa nabesifazane abambethe okuluhlaza okwesibhakabhaka yibona abazowina ekugcineni.”
Okhulumela amaphoyisa uBrigadier uMotantsi Makhele utshele i-Scrolla.Africa ukuthi umshayeli weloli ubesemgwaqeni ku-N3 ngase-Bergview kanti ababhikishi baphonse ibhomu likaphethiloli elolini lasha. Elinye iloli livimbe umgwaqo ngesikhathi lijika.
Uthe amaphoyisa asebenzela ukuletha uzinzo nokuvumela ukuhamba kwezimoto ngokukhululeka emgwaqweni kazwelonke.
Uthe abasolwa kulindeleke ukuthi bavele ngaphambi kweNkantolo yeMantshi yase-Harrismith ngoLwesihlanu.