Lubhalwe ngu-Anita Dangazele
Uphinde waba sematheni uMengameli Cyril Ramaphosa odume “ngeleNyathi” njengoba kulokhu enziwe inhlekisa bembiza ngenyathi edala isphithiphithi!
Imibiko ithi kubonakale inyathi emgwaqeni onguthelawayeka u-R21 ngase-Irene e-Centurion yadala isiphithiphithi nokudideka.
URamaphosa owaduma ngokuthenga inyathi eyayisendalini ngemali elinganiselwa ku-R20 million eminyakeni edlule nokuyinto eyamenza waqanjwa ngokuthi “iNyathi” kubukeka sengathi umlando wakhe usumfice ngendlela eyisimanga.
Abasebenzisi be-Tweeter abachithanga sikhathi ukuhlekisa ngoMengameli bephakamisa ukuthi ugcine esulile futhi uzulazula yonke indawo.
Omunye ubhale into eyisimanga wathi “Tshelani uCyril ukuthi ehle esikhundleni futhi ayeke ukuhamba ngezinyawo emgwaqeni omkhulu ebusuku.”
Omunye ubhale wathi u-@PresidencyZA “kumele beyolanda umphathi wabo,” ngesikhathi owesithathu encokola ethi “uRamaphosa ubonakale ehamba yedwa emgwaqeni onguthelawayeka – futhi singakuqonda lokho!”
Phezu kwesiphithiphithi esidalwe ukubona inyathi emgwaqeni onguthelawayeka, abantu bakuleli bahlulekile ukuzibamba bahleka futhi abaningi bangene ezinkundleni zokuxhumana behleka lolu daba. Sekungolunye usuku kwipolitiki yakuleli njengoba nezilwane sezifakwa khona.
Esithombeni esingenhla: Inyathi izulazula kuthelawayeka u-R21 ngase-Irene e-Centurion.
Umthombo Wesithombe: Twitter