Lubhalwe nguRazeen Gutta
Kuqopheke umlando ngomdlalo wayizolo njengoba bekubhekene izinkunzi uKylian Mbappe noLionel Messi kowamanqamu wendebe yomhlaba onqotshwe i-Argentina ngo 4-2, ishaya iFrance sekukhahlelwa amaphenathi.
Lo mdlalo wamanqamu weNdebe yoMhlaba ye-Fifa ubusenkundleni i-Lusail e-Qatar okuyilapho amaqembu womabili ebonise isimanga.
Kube i-Argentina ebiphethe umdlalo ngesiwombe sokuqala njengoba leli qembu belibhekene ne-France kanti bathole igoli labo lokuqala elibe iphenethi eshaywe uMessi phakathi ngomzuzu ka-23.
UMessi ube ngumdlali wokuqala ukushaya amaphenathi cishe kuyo yonke imidlalo ayidlalile ezigabeni ezahlukene kule ndebe yomhlaba.
U-Angel Di Maria ushaye elesibili ngaphambi kwekhefu eshiya ompetha bomhlaba ka-2018 beshaqekile.
I-France bekuyibhedela njengoba beyihluleka ukuhlanganisa umdlalo wayo.
Konke kushintshe ngesikhathi sekusele imizuzu eyishumi kuphele umdlalo, omunye wabadlali abahamba phambili kulo mdlalo uthole ithuba, kanti noMbappe uvalele igoli enethini ngemuva kwesikhashana beshaye iphenathi.
Ibhola liwumdlalo wesikhashana kanti ngemizuzwana engu-97 umdlalo wamanqamu weNdebe yoMhlaba uvele washintsha.
I-France ivele yanyusa amasokisi yadlala ngokuzimisela, kodwa ngesikhathi esengeziwe i-Argentina iphinde yakwazi ukuhamba phambili. UMessi ubesendaweni efanele ngesikhathi esifanele futhi lo kubukeka sengathi umdlalo obuvuna yena washaya igoli kwaba ngu 3-2.
Kodwa uMbappe ubeqinisekisa ukuthi labadlali base-Argentina babhekana nobunzima. Lo mdlali wase-France ube umdlali wesibili owake washaya amagoli amathathu esigabeni samanqamu eNdebe yoMhlaba ngemuva kukaGeoff Hurst wase-England ngo-1966, ngaleyondlela lo mdlalo wamanqamu ugcine uye kumaphenathi.
UMbappe ushaye phakathi iphenathi yokuqala yeFrance kanjalo noMessi washayela ezakhe kodwa elinye iqhawe kube ngunozinti we-Argentina u-Emiliano Martinez.
Kanti ekugcineni uMessi uthole umklomelo ayekade ewufisa.
Umdlali ongumpetha enkundleni uzuze umklomelo omkhulu kunayo yonke emhlabeni njengomdlali ohamba phambili.
Uzakwabo we-Paris Saint-Germain, uMbappe uhambe nomklomelo womshayimagoli ovelele ngemuva kokuqeda umqhudelwano enamagoli ayisishiyagalombili.
Isithombe esingenhla ngesika kaLionel Messi
Umthombo wesithombe: @FifaWorldCup