Basebumnyameni eSoweto njengoba kuqhuma isiteshi esincane sikagesi

Izakhamizi zaseSoweto kuzomele zithole izindlela zokubekezelela isimo sezulu esinamakhaza ngemuva kokuqubuka komlilo esiteshini esiseZola ngoLwesithathu ekuseni, okudale ukunqamuka kukagesi okukhulu.

Lesi sigameko senzeke njengoba amakhaza eqhubeka nokushubisa umkantsha eGauteng.

Ikhansela lakuWadi- 51, uMnuz Bhekukwenza Mngadi libike ukuthi umlilo uqale ngabo-8.30 ekuseni kulandela ukuqhuma okuzwakale sengathi amabhomu.

Izindawo ezikhahlanyezwe ukunqamuka kukagesi kubalwa iDobsonville, Emndeni, iJabulani, iMoletsane, iMofolo North, iNaledi, iTladi, iZola neZondi.

U-Eskom usebenzisane ne-City of Joburg Emergency Management Services (EMS) ukucisha umlilo.

Inkampani ephehla ugesi ithe ayazi ukuthi ugesi uzobuya nini.

“Sisebenzisana noMnyango wezeziCishamlilo ukubhula umlilo ukuze ochwepheshe bethu benze uphenyo bahlole nokuthi ungakanani umonakalo. Siyaxolisa ngokuphazamiseka okudalwe yilokhu,” kusho u-Eskom.

Okhulumela abezimo eziphuthumayo bakwa-EMS uRobert Mulaudzi ukuqinisekisile ukuthi sishe sonke isiteshi kanti abazi ukuthi umlilo uqale kanjani.

Luhlanganiswe ngumbhali we-Stuff

Isithombe esingenhla: Isithombe somlilo.

Umthombo: X

Izihloko zakamuva