Lubhalwe nguCelani Sikhakhane
Kuphenduke amatafula ngesikhathi ihhashi laseMpumalanga lidla umhlanganiso kwiDundee July Horse Racing lihlula imfivilithi uNxakanxaka.
Ukunqoba kuka-Alfa and Omega kushiye izibukeli zibambe ongezansi.
Lo mjaho obuseNdumeni, enyakatho yeKwaZulu-Natal ushiye wonke umuntu emangele.
U-Alfa and Omega akagcinanga nje ngokuthola udumo kodwa uphinde wagoduka nesamba sika-R300,000 okuyimali ekhuphuke isuka ku-R 250,000 obekungumklomelo wanyakenye.
UMoses Dube ongumnikazi ka-Alfa and Omega uthe ushaqekile futhi umangele ngoba ubengawulindele lo mphumela. “Ihhashi lami liziqeqeshe kanzima. Ngijabule futhi ngifisa sengathi lokhu kungaletha ukuthula.” usho kanje.
Uthe umqhudelwano abagcine ukuwuwina bekuyi-Nquthu June Race obusendaweni yaseMkhonjane ngenyanga edlule.
Ihhashi obekulindeleke ukuthi liwine ngelase-Utrecht esifundeni saseMajuba, uNxakanxaka.
Leli hhashi seliwine umjaho we-Dundee July Horse Racing minyaka yonke kusukela ngo-2019 kodwa kulo nyaka liphume isihlanu nokuyinto eshaqise ababukeli abaningi.
Ngo-2019 ihhashi lase-Port Shepstone eladla umhlanganiso laphucwa umklomelo walo ngemuva kokuthi kutholakale ukuthi liphuma kwamanye amazwe nokuthi lishesha kakhulu uma liqhathaniswa namahhashi elaliqhudelana nawo.
Kwatholakala ukuthi owesifazane ongumnikazi walo udabuka e-Australia. Kwabe sekuchithwa umklomelo wanikezwa uNxakanxaka.
Umjaho wangoMgqibelo ubunendikimba ethi-African Royalty, uphendule umbukiso wemfashini yesintu yase-Afrika.
Abasiki bengqephu babonise ngemvunulo yesintu yama-Masai exutshwe nomgexo wa-Mandebele kanye nemiqhelde yesiZulu kuya kubuciko besi-Xhosa nesi-Sotho.
Lo mcimbi usukhule waba indlela yokuthuthukisa umnotho edolobheni elincane lase-Dundee elidume ngezimayini zamalahle kuMasipala waseNdumeni.
UMthandazo Dladla wase-Glencoe uthe bahlomule kakhulu ngoba izindlu zabo beziqashiselwe abantu ukuze bathole indawo yokuhlala ngesikhathi somjaho.
Lo mcimbi ubezinto eziningi ezithokozisayo njengoba bekunamatende amaningi lapho amaqembu nabaculi abehlukene abebecula khona kwaze kwaba phakathi kwamabili.
Esithombeni esingenhla: U-Alfa and Omega uklonyeliswe njengo mnqobi we-2023 Dundee July Horse Racing emjahweni obuseNdumeni ngoMgqibelo.
Umthombo wesithombe: sithunyelwe