Moyahabo Mabeba
Izigilamkhuba zihamba zingena umuzi nomuzi e-Seshego zisabisa abantu abaphuma emazweni angaphandle abangenazo izincwadi ezisemthethweni zokuba kulelizwe ukuthi baphume baphele ungakashayi umhlaka-2 kuNhlangulana.
Amaphoyisa asekhiphe isixwayiso ngabantu abazithathela umthetho bawubeke ezandleni, ngoba amaphoyisa nezinhlaka ezisemthethweni kuphela ezinegunya lokuxosha abantu.
UMnu uNhlanhla “Lux” Dlamini kuleli sonto uqhamuke njengomunye wabantu abahamba phambili emibhikishweni obhekiswe kubantu abaphuma emazweni angaphandle.
NgoMgqibelo, uDlamini uhambe ngebhasi nequlu labantu besuka e-Soweto beya e-Sandton. Ufike, wahola umbhikisho enxanxatheleni yezitolo efuna ukuthi izindawo zokudlela ezise-Sandton City ziqashe abantu bendawo kuphela.
NgeSonto ubhekise amehlo kubantu bokufika abahlala e-Seshego e-Limpopo.
Yena kanye namalungu eqembu elimelene nabokufika basuke emjondolo baya ezakhiweni behambe betshela abantu bangaphandle ukuthi babuyele emazweni abo ungakadluli umhlaka-2 kuNhlolanja.
Esinye isakhamuzi sase-Zimbabwe esihlala e-Seshego sithe sibizwe nguDlamini namalungu enhlangano i-Seshego Community Against Gangsterism and Crime (SCAGAC), bamsabisa ngokuthi avume ukulifulathela lelizwe ngomhlaka-2 kuNhlolanja.
Kunemibiko yezinye izakhamizi ezizivalele ezindlini zazo ngenxa yokwesabela ukuphepha kwazo kanye nezitolo eziphethwe abokufika zivaliwe njengoba kuhlangene ababhikishi.
UDlamini namalungu e-SCAGAC basolwa ngokuphazamisa amalungu ebandla akade esonta ngoba abazalwane benobuzwe base-Zimbabwe.
Kamuva uDlamini ubhale ku-Twitter ukuthi: “Sixwayisa amasonto mbumbulu anabefundisi mbumbulu bangaphandle abasebenzisa ukuphuka kwemimoya yabantu futhi basizakale ngabantu baseNingizimu Afrika abaphila nenhlupheko.”
NjengoMnu uJulius Malema we-EFF, uDlamini uthi akabheki abantu bokufika, kodwa uhlose abahleli eNingizimu Afrika ngokungemthetho. Asibhekile abantu abamnyama kuphela. Noma ngabe umhlophe, umnyama noma yinoma iluphi uhlanga – uma ukuleli lizwe ngokungemthetho, uzobhekana nathi,” etshela i-Scrolla.Africa.
Okhulumela amaphoyisa esifundazweni sase-Limpopo uBrigadier uMotlafela Mojapelo uthe izenzo zokusabisa nokugqugquzela udlame ngeke zibekezelelwe, futhi noma ngubani osolwa ngokwenza lobu bugebengu uzoboshwa.
UBrigadier Mojapelo uthe uDlamini noma amalungu e-SCAGAC abakaboshwa okwamanje, kodwa waqinisekisa ukuthi baqashwe ngeso lokhozi.
.
