Lungani Zungu
UMengameli uCyril Ramaphosa usolwa ngokubalekela imibuzo ayibuzwe ePhalamende ngoLwesibili mayelana nehlazo lepulazi i-Phala Phala.
USomlomo wePhalamende uNosiviwe Mapisa-Nqakula, ngoLwesine uthe uzobhalela uMengameli acele ukuthi abuyele ePhalamende.
Ngemuva kokufika kukaRamaphosa, uMapisa-Nqakula ubelokhu ethethiswa amalungu ePhalamende amsola ngokuvikela uMengameli emibuzweni enzima.
Kodwa-ke, usebenzise umhlangano wangoLwesine weKomiti loHlelo ukuze azikhulule.
“IsiShayamthetho kanye noSomlomo akufanele neze bakhe isithombe sokuthi akazimisele ukwenza isigungu ukuthi siphendule. Bekungeyona inhloso yami leyo,” kusho uMapisa-Nqakula.
Ukuvela kukaRamaphosa ePhalamende ngoLwesibili bekulindeleke ukuthi kucacise ngokwebiwa kuka-$4 million epulazini lakhe i-Phala Phala e-Limpopo, kodwa umhlangano ugcine uphenduke isiphithiphithi.
Amalungu amane e-EFF akhishiwe ePhalamende, okungenani amabili awo kudingeke ukuthi akhishwe ngendluzula.
URamaphosa utshele amalungu ePhalamende ukuthi welulekwe ukuthi angaphawuli ngodaba lwe-Phala Phala ngoba kusaphenywa.
Lokhu kucasule amalungu ePhalamende amaqembu aphikisayo.
Iseshini elandelayo yemibuzo izoba ngomhlaka-29 kuMandulo.
Kodwa i-EFF kanye ne-ATM bafuna uRamaphosa avele ePhalamende ekuqaleni kwesonto elizayo.
IPhini lomholi we-EFF, uFloyd Shivambu uthe: “Kumele lokhu kuphuthunyiswe futhi akumele kube ngomhlaka-29 kuMandulo.”
I-IFP ithathe izinyathelo ezilula yathi uSomlomo uMapisa-Nqakula akabhalele uMengameli incwadi ambuze ukuthi uzokwazi nini ukuba ePhalamende.
Ephendula iziphakamiso zokuthi uRamaphosa kumele avele ngesonto elizayo ePhalamende, uMapisa-Nqakula uthe: “Ngeke ngikwazi ukwenza isinqumo mayelana nokuba khona kukamengameli. Akumina ophethe idayari yakhe.
“Ngakho-ke ngizobhalela uMengameli futhi ngizolinda ukuthi uMengameli aphendule bese eyasitshela ngosuku azotholakala ngalo,” esho.
Owayengumphathi wezinhloli u-Arthur Fraser uvulele uRamaphosa indlela yokugxekwa ngesikhathi emsola ngamacala kulandela ukugetshengwa kwepulazi likaMengameli ngo-2020.