Celani Sikhakhane
Abaholi be-ANC bahlangane ngaphandle komuzi kalowo owayenguMengameli wezwe uMnu uJacob Zuma ngoLwesibili ngaphambi kwengqungquthela yokukhetha ubuholi KwaZulu-Natal ngoNtulikazi.
Akumangazi ukuthi uZuma usephenduke waba nomthelela ekusungulweni kwale ngqungquthela.
Abamele izifunda ezingu-11 zaleli qembu bahlangane kwaDakwadunuse eNkandla.
Abaholi bezifunda bachithe cishe amahora amahlanu benomhlangano noZuma, kodwa ngemuva kwalokho akekho noyedwa kubo oveze okuningi ngezinto ebezidingidwa.
Kunalokho iningi lithi beliyofuna izeluleko kuZuma.
Yize kunjalo uSihlalo we-ANC esifundeni iHarry Gwala, uMnu Zamo Nxumalo utshele izintatheli ngaphandle kwale ndawo ukuthi ingxenye yengxoxo yabo imayelana nohlelo lokuthi bangabuyiselwa kanjani endaweni elahlekile.
UZuma uphiwe izipho zikanokusho okubalwa nezinkomo.
Unzima umjaho wokuhola iKwaZulu-Natal kanti ozophumelela uzohola izithunywa ezingaphezu kuka-700 engqungqutheleni yokukhetha ubuholi be-ANC ehlelelwe ukuba ngoZibandlela.
Kuze kube yimanje umjaho e-KZN uphakathi kukaNgqongqoshe wezeziMali uNkk Nomusa Dube Ncube noSihlalo okhona njengamanje uNdunankulu uSihle Zikalala.
Laba bobabili ibona abathandwayo, kodwa akhona amanye amagama avelayo kulo mjaho njengomnikazi waMaZulu FC uSandile Zungu, uNgqongqoshe wezokuThutha uPeggy Neliswa Nkonyeni nowayenguMqondisi Jikelele e-KZN uNhlanhla Ngidi.
Lowo owake waba iMeya yase-Newcastle uDkt Ntuthuko Mahlaba naye ukuqinisekisile ukuthi naye uyangena yize kudingeke ukuthi ashenxe eqenjini.
Uhlelo lokuqokwa kwamagama ngamagatsha e-ANC luyavalwa ekupheleni kukaNhlangulana.
.
