Babalelwa kwizi-5 000 ababulawa kwathi abayizi-10 000 badlwengulwa ezinyangeni ezintathu zokuqala zonyaka

Izinga lokubulawa kwabantu eNingizimu Afrika likhuphuke phakathi kukaMasingana noNhlangulana ngowe-2021, kwashona abantu ababalelwa kwizi-5 000.

Cishe abantu abayizi-10 000 badlwengulwa ngesikhathi esifanayo.

UNgqongqoshe wamaPhoyisa uBheki Cele umemezele izibalo zakamuva zobugebengu, zangoMasingana kuya kuNhlangulana, ngoLwesihlanu.

Izinga lokubulawa kwabantu abayizi-4,976 likhuphuke ngama-387 esbalo sabantu abashonile esikhathini esifanayo ngonyaka odlule.

UCele uthe kulesi sibalo kubalwa namaphoyisa angama-24 abulewe ezinyangeni ezintathu zokuqala zonyaka.

Bekunamacala okudlwengulwa ayizi-9,518 – abehle ngamaphesenti amane ngesikhathi esifanayo ngowe-2020.

“Isiteshi samaphoyisa sase-Eastern Cape e-Lusikisiki saqopha izigameko eziphakeme kakhulu zokudlwengulwa, sadlula isiteshi sase-Nanda esidabukisayo esathatha isikhundla sokuqala iminyaka eminingi,” kusho uCele.

UNgqongqoshe wamaphoyisa uphawule wathi: “Udlame lwezocansi olubhekiswe kwabesifazane kuleli luyihlazo nje.”

Ngokuqondene nokuhlaselwa emapulazini ngalesi sikhathi, kwabulawa abantu abayi-11, okubandakanya abalimi abane noma abanikazi bamapulazi kanye nabasebenzi basepulazini ababili.

Ubugebengu obungenabo ubudlova behlile: ubugebengu obuhlobene nempahla behle ngamaphesenti angama-20,8 kanti ukwebiwa kwemfuyo kwehle ngamaphesenti ayi-11,1 kwehla kunangesikhathi esifanayo ngonyaka odlule.