Sizwe Sibiya
Umculi wengoma ethi “Siyathandana” uBoohle ugcine eseyikhiphile i-vidiyo yengoma yakhe entsha ethi, “Ngimnandi”. Ingoma ihlanganisa uDJ nomdidiyeli uGaba Cannal, kodwa bambalwa kakhulu asebeyibukile.
Njengoba enabantu ababhalisile abangaphezudlwana nje kuka-50,000 ku-akhawunti yakhe ye-YouTube i-Boohle SA, i-vidiyo yakhe yomculo isabukwe abantu abangu-35,000 ngemuva kwamahora okuqala angu-24 endaweni yokusakaza i-vidiyo. Lokhu kubuyisela emuva lo mculi osekhiqize izingoma ezishisa izikhotha ngonyaka odlule, njengoba amavidiyo eculo lakhe elithi “Singili” abukwa izigidi ezimbili.
Khonamanjalo ingoma ethi “Siyathandana” ayikhiphe noCassper Nyovest ngonyaka odlule, isibukwe ngabantu abangu-12 million.
Mhlampe sesijahe kakhulu ukuzibuza ukuthi lo mculi kufanele akhathazeke yini ngomsebenzi wakhe womculo noma cha, kodwa iyodwa into esiyaziyo ukuthi ngemuva kokulalela ingoma ethi “Ngimnandi” uBoohle uzobe eqhubeka nokuphila kahle – noma nje kusambhedela ngokwezimali.
“Ngicela ungiboleke izinkulungwane. Ngicela ungiboleke isigidi. Ngicela ningiboleke imali,” kucula uBoohle ekhuthaza abantu abangenamali njengaye kulenyanga kaMasingana ngemuva kwesiphithiphithi samaholidi .
Umthombo wevidiyo: YouTube