Lubhalwe ngu-Anita Dangazele
Amaqembu ayishumi kwangu-18 anezihlalo ePhalamende likazwelonke asayine isitatimende senhloso yokungena kuHulumeni woBumbano lukaZwelonke (GNU), kumemezela i-African National Congress (ANC) ngoMgqibelo.
La maqembu kubalwa kuwo i-ANC, i-DA, i-Patriotic Alliance, i-IFP, i-GOOD, i-FF Plus, i-UDM, i-Rise Mzansi kanye ne-Al Jama-ah amukelwe ngokusemthethweni ku-GNU ngempelasonto.
Ngokwesitatimende esikhishwe i-ANC, isigaba sokuqala samaqembu sokujoyina i-GNU sesiphelile.
“Ngemuva kwamasonto amabili ezingxoxo ezishubile, amaqembu ayishumi kwangu-18 anezihlalo eSishayamthetho sikaZwelonke asayine iSitatimende Senhloso yokungena ku-GNU, ekhombisa ukuzimisela kwawo ukubambisana nokubeka abantu bakuleli phambili.
“Ngokuhlangene, amaqembu akha i-GNU athole amavoti angaphezu kuka-70% okhethweni lwango-2024, eqinisekisa ukumeleleka okubanzi kanye negunya eliqinile lokuphatha.
“Amaqembu avumelene ngokulandelwa kwemigomo eyisisekelo eshiwo eSitatimendeni seNhloso kanye nokusebenzisana ukufeza izinhloso zawo,” kufundeka isitatimende.
Amaqembu afisa ukujoyina i-GNU azoba ngaphansi kwesigatshana sesi-24 seSitatimende seNhloso esithi: “Ngokuvumelana nomoya we-GNU obandakanya bonke abantu, kuvunyelwane ngokuthi ukwakheka kwalo hulumeni kuzoxoxwa futhi kuvunyelwane phakathi kwamaqembu ekhona, noma nini uma amaqembu amasha eba nesifiso sokuba yingxenye ye-GNU.”
Esithombeni esingenhla: IPhini likaMengameli we-ANC uPaul Mashatile noSihlalo we-ANC uGwede Mantashe kanye nomholi we-DA uJohn Steenhuisen.
Umthombo wesithombe: Facebook