“Angiyi ndawo,” kusho u-Ace Magashule

Lungani Zungu

U-Ace Magashule ukhwele wadilika kumalungu eKomidi Eliphezulu Likazwelonke le-ANC athembekile kuMengameli uCyril Ramaphosa azama ukumsusa esikhundleni sokuba uNobhala-Jikelele weqembu.

Engxoxweni ekhethekile abe nayo nabakwa-Scrolla.Africa, uMagashule uthe: “Yimpi le, futhi ngeke ngihlehle. Ngizolwa kuze kube sekugcineni.”

I-ANC NEC, okuyisigungu esiphezulu seqembu esithatha izinqumo, sibe nomhlangano kule mpelasonto kodwa umhlangano waphela isigubhukane ngemuva kokuthi amanye amalungu e-NEC ecele ukuthi amiswe esikhundleni uMagashule ngokuhambisana nenqubo-mgomo ye-ANC.

Kodwa ozakwabo bakaMagashule kwi-NEC bamvikela.

“I-ANC akuyona eyomuntu. Kodwa eyamagatsha,” kusho uMagashule.

UMagashule ubhekene namacala angahle aqede umsebenzi wakhe wezepolitiki, ngenxa yethenda yezigidi ezingama-R255 eyakhishwa ngesikhathi esenguNdunankulu wase-Free State.

UMagashule uthe ikhomishini yezobuqotho, eholwa yisiqhwaga seqembu, uGeorge Mashamba, akumele ibe yisikhali sokuqeda izimbangi zombusazwe.

Ikhomishini iphakamise ukuthi amiswe emsebenzini.

Lokhu kuhambisana nenqubomgomo ye-ANC yokuthi amalungu eqembu abhekene namacala obugebengu kufanele amiswe emsebenzini.

Abakwa-Scrolla.Africa bathole emithonjeni emithathu ezimele ukuthi uMagashule usola uRamaphosa ukuthi ulwisana naye.

“Asivumele amagatsha akhulume. Ngakhethwa ngamagatsha, futhi yibona kuphela abantu abangangisusa esikhundleni sami,” kusho uMagashule.

Amazwi akhe okuvalelisa athe: “Angiyi ndawo.”

Abakwa-Scrolla.Africa bathole emithonjeni emithathu yeqembu ezimele ku-NEC ukuthi uTony Yengeni ubephakathi kwabantu abagxumele phezulu ukuvikela uMagashule.

“Kuvele kwashuba emhlanganweni kwadingeka ukuthi kukhuzwe amalungu abasephume endleleni. Lesi yisikhathi sokuphenduka kukahuhumeni we-ANC selokhu kwaqala intando yeningi,” kusho ilungu le-NEC elingathandanga ukudalulwa.

UPule Mabe, okhulumela i-ANC unqabile ukuphawula.

Umthombo wesithombe: @magashule_ace