Angifuni omakhelwane bami bangizonde!

Kabelo Tlhabanelo

UNongazi Mthombeni unovalo lokuthi iphunga lesitamukoko elizungeze indlu yakhe lizokwenza omakhelwane bakhe bamzonde.

Ezinyangeni ezintathu ezedlule, uNongazi wase-Freedom Square e-Mangaung, e-Free State ubelokhu enxusa ikhansela lewadi ukuthi kulungiswe le nkinga, kepha izicelo zakhe ziwele ezindlebeni ezingezwa.

USampi Mokhatli ongumakhelwane uthe, uyazi ukuthi uNongazi ukhathazekile ngokuthi angalahlekelwa ngabangani bakhe endaweni.

“Kodwa leli akulona iphutha lakhe. Ngiyazi ukuthi wenza konke okusemandleni akhe ukukulungisa. Akekho ofuna ukuphila nendle,” esho.

UNongazi utshele abakwa-Scrolla.Africa ukuthi ikhansela uMatekane Nkoe ungumuntu onamanga.

“Uthe, uzothumela iqembu lakhe kodwa akekho ofikile,” esho.

“Ngesonto eledlule badlule endlini yami. Babeyibona kahle inkinga yami kodwa banganaka.”

Uthe, kunzima ukuya endlini yangasese.

“Ngingawa kalula ngenxa yezitini esizisebenzisa ukunyathela phezu kwazo futhi ngiphuke amathambo. Ngizizwa ngivalelekile ekhaya lami ngenxa yokushoda kwezidingo,” kusho yena.

Ikhansela lewadi uMatekane Nkoe uthe akakaze athole isikhalazo esivela kuNongazi.

“Ngihlale ngitshela abahlali ukuthi babike ngqo kimi futhi angicabangi ukuthi uNongazi ukwenzile lokho,” kusho uNkoe.

“Ngizothumela ithimba ukuthi liyophenya. Ngiyakuqinisekisa ukuthi ngiyazisukumela izinkinga ngokushesha. Alukho ucingo olungenayo olumayelana nesitamukoko olulinda izinsuku ezingaphezu kwezimbili ngaphandle kokuthola ukunakwa.”

UNongazi uthe, uzolinda izinsuku ezimbili ukuze abone ukuthi ikhansela lewadi lizokwenza njengoba lithembisile.