Lubhalwe nguMichael Madyira
IKaizer Chiefs ne-Orlando Pirates ngeke babe ingxenye yemidlalo yokuqala ye-CAF Super League.
Kuhlelelwe ukuthi kuqale imidlalo ye-Super League ngoMfumfu njengoba kuzobe kukhona amaqembu ayisishiyagalombili okuhlanganisa neMamelodi Sundowns.
Ekuqaleni bekuhlelelwe amaqembu angu-24 ukuthi aqhudelane kodwa manje kuzoqalwa ngayisishiyagalombili ngaphambi kokuthi kufakwe amanye ngokuzayo.
Ngokombiko we-MTNFC, iPetro Atletico, iTP Mazembe, i-Al Ahly, iHoroya SC, iWydad Casablanca, iSimba SC ne-Esperance bazojoyina iSundows kulo nyaka.
Indlela ye-CAF yokukhetha abazoqhudelana esigabeni sokuqala se-Super League ikhombisa amalungu enhlangano angamelwe emelwa inhlangano ngayinye.
Le ligi iphethe ompetha be-continental abafana ne-Zamalek, i-Raja Casablanca, i-Etoile du Sahel ne-AS Vita.
Isikhulu se-CAF sikuqinisekisile kwa-Scrolla.Africa ukuthi iNdebe ye-Super Cup izoqala ngoMfumfu nakuba kusazophothulwa indlela yomqhudelwano.
IPirates izobe iyizibukeli yize yafinyelela kowamanqamu eNdebe ye-CAF Confederation ngesizini edlule.
Kule minyaka eyishumi edlule, amaBhakabhaka aphume isibili kathathu emiqhudelwaneni yamazwe.
Ngisho nompetha abavikela iNdebe ye-Confederation i-RS Berkane ngeke babe ingxenye ye-Super League yalo nyaka.
IChiefs efinyelele kowamanqamu we-CAF Champions League kumasizini amabili edlule nayo izophuthelwa.
Lesi sinqumo sethulwa ngoMfumfu nyakenye sasekelwa uMengameli we-FIFA, uGianni Infantino owakuchaza njengomlando owethula umbono ohlukile we-Super League.
Lokhu kulandela ukungahambisani nesiphakamiso sokwethulwa kwe-UEFA Super League kanti uMengameli we-CAF,uPatrice Motsepe uvikela umbono wase-Afrika.
“Le ingxenye yezinhlelo ezithokozisa kakhulu emlandweni webhola lase-Afrika futhi kuzoba neqhaza elikhulu ekuthuthukisweni nasekukhuleni kwezinga nokuncintisana kwebhola e-Afrika,” kusho uMotsepe.
Abazongenela lo mqhudelwano base-Afrika bazobe bezilungiselela ukuthola imali ephuma emqhudelwaneni ka-R1.8 billion.
Ukujula kweqembu leSundowns kuzophinde kuhlolwe njengoba ilungiselela unyaka omatasatasa.
Njengoba isivele ilinganisa imiqhudelwano yasekhaya kanye ne-CAF Champions League, iSundowns manje inemisebenzi eyengeziwe okufanele iyiqedele uma kuqala i-Super League.
Isithombe esingenhla: Abadlali beKaizer Chiefs
Umthombo wesithombe: Kaizer Chiefs