Menzi Magubane
Umqeqeshi we-Malawi uMario Marinica ubethukuthele ngemuva komdlalo wangempelasonto esola abaqeqeshi base-Afrika ngokuba ngamaqola watshela nomdlali weqembu ukuthi ufisa ngathi angaphuka umlenze.
“Onompempe base-Afrika ngeke badlale imidlalo yeNdebe yoMhlaba ngenxa yokuba ngamaqola,” kubhoka lo mqeqeshi odabuka e-Romania ngemuva kokuthi iqembu lakhe lidlale ngokulingana ne-Eswatini lakhishwa esigabeni samaqoqo kwindebe ye-Cosafa eThekwini.
Lo mqeqeshi uphinde wahlasela umdlali wase-Eswatini uSabelo Ndzinisa ngemuva kokugixabezwa ngephenalthi eshiya umqeqeshi wase-Romania evutha engabaselwe.
“Ngiyafisa ukuthi uphuke umlenze ungabe usakwazi ukudlala ibhola,” kusho lo mqeqeshi.
Amazwi akhe angase ahehe iKomidi Lokuqondisa Izigwegwe le-Confederation of African Football (i-CAF) okungenzeka limbize ukuthi azophendula ngezenzo zakhe.
Khonamanjalo i-CAF ikuqinisekisile ukuthi uMarinica neqembu lakhe lase-Malawi badlulele emzuliswaneni wesibili wokuhlungela i-Chan ka-2022 ngaphandle kokukhahlela ngisho ibhola ngemuva kokwehluleka kwe-Zimbabwe ukususa isigwebo sabo se-Fifa.
I-Flames iqhathwe ne-Zimbabwe emzuliswaneni wokuqala kweyokuhlunga.
Ekuqaleni i-CAF yayiveze ukuthi umdlalo uzoqhubeka kuphela uma ukuvinjelwa kwe-Fifa yase-Zimbabwe kuzophela emasontweni amabili ngaphambi komdlalo wokuqala owawuhlelelwe umhlaka-23 kuNtulikazi.
NgoLwesibili i-CAF ithumele incwadi kwi-Malawi Football Association iqinisekisa ngezinguquko ezintsha.
“Okubuhlungu ukuthi inhlangano yase-Zimbabwe ayizange yenze ngokusho kwe-Fifa congress, ingakho isamisiwe.
“Ngokwemthetho ebekiwe: uma ukuvinjelwa kwe-Zimbabwe FA kungahoxiswa emasontweni amabili ngaphambi komdlalo wayo wokuqala izothathwa njengeqembu elihluliwe futhi ikhishwe emqhudelwaneni,” kufundeka incwadi.
Incwadi iqhube yathi yonke imidlalo ye-Zimbabwe esesigabeni sokuqala sokuhlungela eye-Chan 2022 isichithiwe, ngakho-ke i-Malawi isingene esigabeni sesibili somqhudelwano.
I-Flames isizobhekana ne-Zambia ne-Mozambique emzuliswaneni wesibili kweyokuhlunga.
Umthombo wesithombe: @SportsNewsAfrica