Linda Ximba
Njengoba osisi abadumile bakwaWilliams sebethathe umhlalaphansi, amawele akwaNkosi eKZN afuna ukulandela ezinyathelweni zabo.
U-Anele noSanele, bobabili abaneminyaka engu-15, bobabili bafunda ibanga lesikhombisa esikoleni samabanga aphezulu e-Mpangeni futhi benze kahle kakhulu emiqhudelwaneni yezikole yezifunda.
U-Anele utshele i-Scrolla.Africa ukuthi iphupho labo ukuba ngabadlali bethenisi abasezingeni eliphezulu futhi igama labo laziwe kakhulu endaweni ngaphambi kokuzakhela udumo emdlalweni yamazwe ngamazwe.
“Kusukela sineminyaka engu-12, saba nothando lwethenisi ngokubuka umfowethu omdala,” kusho u-Anele.
Amawele abonge isikole nabazali ngokubeseka aphinde abonga nomqeqeshi wabo onesineke uMnu uBika Ntuli.
“Usifake ngaphansi kwesandla sakhe futhi siyakhula,” kusho elinye lamawele.
U-Anele ujabulile ngethemba lokumela iKZN kwi-Tennis South Africa Inter-Provincial Tournament kusukela ngomhlaka-18 kuya kumhlaka-22 kuNdasa lapho kuzoqhudelana khona izikole ezingu-19.
“Ngikhethwe ngemuva kokwenza kahle emdlalweni yesifunda. Ngihlose ukwenza kahle kwelesizwe ukuze ngifeze iphupho lethu lokungena eqenjini lesizwe ngokuzayo,” kusho u-Anele.
“Ngokusebenza kanzima ngizibona mina nodadewethu silingisa osaziwayo esibathanda kakhulu, izelamani zakwaWillams eziqophe amarekhodi ngokuwina izicoco eziningi ze-Grand Slam.”
USanele, iwele lika-Anele, uthe banethemba lokuthi impumelelo yabo enkundleni yethenisi izovula indlela yomfundazwe uma sebefuna ukudlala nokubhalisa ezikhungweni zemfundo ephakeme.
.
