Lungani Zungu
I-EFF ne-ANC bathembise ukwakhela imindeni enhlwempu izindlu eNkandla kwisiphithiphithi sokunqoba abavoti edolobheni lalowo owayenguMengameli wezwe uJacob Zuma.
Umasipala waseNkandla njengamanje uphethwe yi-IFP, okuyiqembu elidumile edolobheni laKwaZulu-Natali elisenyakatho yasemakhaya.
Bekungeke kube okokuqala ukuthi i-EFF kaJulius Malema yakhele omakhelwane bakaZuma indlu.
Ngowezi-2014, i-EFF yakhela uSthandiwe Hlongwane indlu, ohlala eduze nomuzi kaZuma, ngaphambi kokhetho lukazwelonke lwangowezi-2014, lapho i-EFF eyathola khona amavoti angaphezu kwezigidi eziyi-1.1.
Kodwa-ke, imibuzo iyabuzwa ukuthi ngabe kusafanele yini ukuthi kukhankaselwe egcekeni likaZuma eNkandla, lapho omakhelwane bakhe behlambalaze khona iqembu lakhe, i-ANC, ngisho nangenkathi esasenguMengameli wezwe phakathi kowezi-2009 nowezi-2018.
Engxoxweni abe nayo ne-Scrolla.Africa, uMalema uthe uzifuna zonke izigceme eKZN.
“Sizokhankasa yonke indawo, ngisho nasemagcekeni akwaZuma eNkandla,” esho.
UMalema uvinjelwe ukukhankasa KwaDambuza ngamalungu e-ANC ngoMgqibelo.
Ephendula ngalokhu, uMalema uthe akukho ndawo okumele ibe yindawo yokungahambi eNingizimu Afrika.
“Asikwazi ukuvumela amaqola kaKhongolose ukuthi asivimbe ekukhankaseni noma kuphi ezweni,” kusho uMalema, wengeza ngokuthi, “Sizotholana nabo phezulu uma befuna ukulwa nathi”.
I-ANC esifundeni iMoses Mabhida manje isithembisa ukwakhela umndeni wakwaMhlongo oseNkandla indlu.
I-IEC ikhuthaze abantu abaningi baseNingizimu Afrika ukuthi babhalisele ukuvota ku-inthanethi ngemuva kwempelasonto yokubhalisa ngaphambi kokhetho lwangomhla wokuqala kuLwezi.