Menzi Magubane
Iyashintsa imigomo ye-Conferderation African Football njengoba isifuna amaqembu abesilisa abe namaqembu abesifazane.
Ngesikhathi i-Confederation of African Football itshela amaqembu ase-Afrika ukuthi kumele abe neqembu labesifazane elizodlala kuma-Champions League, abaningi babelindele ukuthi i-Orlando Pirates ne-Kaizer Chiefs ibe izibonelo.
Kodwa lezi zikhondlakhondla ezimbili zase-Soweto azikawulandeli umthetho omusha futhi lokhu kungenza izinto zibe zimbi uma beqhubeka nokuchukuluza umfelandawonye. Kodwa i-Pirates ne-Chiefs akuwona wodwa amaqembu aseNingizimu Afrika asazobumba amaqembu abesifazane.
Empeleni kunamaqembu angu-14 angakawulandeli umthetho omusha we-CAF weshumi nesithupha.
Ngonyaka odlule i-CAF, ngaphansi kobuholi bukaMengameli omusha uPatrice Motsepe yakubeka kwacaca ukuthi wonke amaqembu ase-Afrika kumele abe namaqembu abesifazane ukuze abambe iqhaza kwi-Champions League ne-Confederation Cup.
Njengamanje i-Mamelodi Sundowns ne-TS Galaxy iwona kuphela amaqembu kwi-DStv Premiership anamaqembu abesifazane.
Njengamanje iqembu labesifazane le-Downs lingompetha base-Afrika ngemuva kokunqoba i-CAF Women’s Champions League ngonyaka odlule e-Egypt.
Wonke amaqembu kufanele aqale ukuthatha i-CAF ngokukhulu ukuzimisela ukulandela ubuholi obuhle be-Sundowns nokuba ingxenye ye-Champions League ne-Confederation Cup.
I-Pirates, i-Chiefs, i-Royal AM, i-Marumo Gallants ne-Tshakuma Tsha Madzivhandila banamathuba okuhlungela imiqhudelwano ye-CAF ngesizini ezayo.
Njengamanje ama-Bucs ne-Chiefs bajahe indawo yesibili kwi-Premiership okungenzeka ukuthi omunye wabo angene kwi-Champions League.
I-Royal AM nayo inethuba lokungena kwi-Champions League uma iqeda endaweni yesibili futhi isengakwazi ukungena kwi-Confederation Cup uma inganqoba i-Nedbank Cup.
I-Gallants ne-TTM isethubeni lokunqoba i-Nedbank Cup.
Kodwa uma bezimisele ngokudlala emiqhudelwaneni ye-CAF ngesizini ezayo futhi uma bewahlonipha amaqembu abesifazane kumele bahlanganise bakhe lawo maqembu abesifazane.
Umthombo wesithombe: @SundayWorld