Akekho owashayela amaphoyisa noma abezimo eziphuthumayo ucingo ngesikhathi kudutshulwa uSenzo Meyiwa, lokhu kudalulwe eNkantolo eNkulu yasePitoli ngoMsombuluko.
Ufakazi woMbuso uColonel Lambertus Steyn uveze lokhu ngesikhathi ehlaziya imininingwane yomakhalekhukhwini babantu ababesendlini ngesikhathi sesigameko.
USteyn osebenza ophikweni oluphenya amacala oluzinze ekomkhulu lamaphoyisa ePitoli uveze ukuthi wababheka omakhalekhukhwini kodwa wangayithola inombolo yamaphoyisa okubalwa neyezimo eziphuthumayo u-10111.
Ngesikhathi ephekwa ngemibuzo nguSipho Ramosepele ongummeli wabamangalelwa ababili, uSteyn uveze akutholile okwenza kube nemibuzo mayelana nokungathathwa kwezinyathelo ezisheshayo zokuqwashisa iziphathimandla.
USenzo Meyiwa wadutshulwa wabulawa ngesikhathi esekhaya lentombi yakhe uKelly Khumalo e-Vosloorus ngomhlaka-26 kuMfumfu ngo-2014.
Bekukhona nodadewabo uZandile, isoka lakhe uLongwe Twala kanye nabangani ababili bakaMeyiwa abaqhamuka KwaZulu-Natal.
Icala lokubulala libandakanya abasolwa abahlanu: uMzikawukhulelwa Sibiya, uBongani Sandiso Ntanzi, uMthobisi Prince Mncube, uMthokoziseni Maphisa noSifisokuhle Nkani Ntuli. Bonke bawaphikile amacala.
Ufakazi wokuqala wombuso kuleli cala eliqale kabusha uZandile Khumalo uveze ukuthi wazama ukushayela ku-10111 ukuze athole usizo kodwa washaywa wuvalo wacela usizo kumakhelwane.
Ebufakazini obudlule uSteyn waveza ukuthi ummangalelwa uNtuli washayela uKelly ucingo amahlandla amabili nokuyinto ekhombisa ukuthi ummangalelwa uyazana naye futhi bebelokhu bethintana ngocingo.
NgoMsombuluko ummangalelwa uNtanzi uvumile ngomlomo kammeli wakhe ukuthi inombolo eyamaniswa naye ecutshungulwe uSteyn ngeyakhe kodwa wathi wayengenayo ngo-2014.
Uveze ukuthi inombolo yabhaliswa ngokomthetho i-Regulation of Interception of Communications and Provision of Communication-Related Information Act (Rica) ngo-2019 esitolo e-Rustenburg.
USteyn ugcizelele ukubaluleka kokuthi ummangalelwa avume ukuthi inombolo yocingo ngeyakhe wathi kungenzeka ukuthi ucingo lwalubhaliswe kwi-Rica ngaphansi kwegama lelungu lomndeni.
Icala liyaqhubeka njengoba kwethulwa obunye ubufakazi enkantolo.
Luhlanganiswe nguMbhali we-Staff
Esithombeni esingenhla: USenzo Meyiwa